अकोलाः या हंगामात सुरवातीपासूनच संकटांशी सामोरा जात असलेल्या शेतकऱ्याला वर्ष मावळतीला जात असतानाही नैसर्गिक आपत्तीचा सामना करावा लागला. मंगळवारी (ता.२८) आलेल्या गारपिटीत तब्बल २६ हजार हेक्टरवरील पिके बाधित झाली आहे. याबाबत प्रशासनाने प्राथमिक अहवाल तयार करीत शासनाकडे सादर केला आहे.

मंगळवारी दुपारपासून रात्री उशिरापर्यंत मेघगर्जनेसह पाऊस, विजांचा कडकडाट झाला. अर्धा तास गारपीटही झाली होती. यामुळे रब्बी पिकांसह भाजीपाला, कांदा व फळबागांचे अतोनात नुकसान झाले. या नुकसानाची प्राथमिक माहिती यंत्रणांनी गोळा केली. चारच तालुक्यात सुमारे २५ हजार ९५० हेक्टरवरील पिकांचे नुकसान झाले आहे. पाऊस व गारपिटीमुळे शेतकऱ्यांचे हरभरा, तूर, गहू, कपाशी, भाजीपाला, कांदा आदी पिके बाधित झाली. अकोला, बार्शीटाकळी, मूर्तिजापूर, बाळापूर व पातूर तालुक्यात पिकांचे नुकसान झाले आहे. 

या चार तालुक्यात झालेल्या पीक नुकसानीचे संयुक्त पंचनामे करण्याचे निर्देश पालकमंत्री बच्चू कडू यांनी शासकीय यंत्रणांना यापूर्वीच दिले आहेत. त्यानुसार नुकसानग्रस्त शेती क्षेत्राचे संयुक्त पंचनामे कृषी सहाय्यक, ग्रामसेवक व तलाठी यांच्यामार्फत करण्यात केले जाणार आहेत. या व्यतिरिक्त पीकविमा काढलेल्या शेतकऱ्यांनी नुकसानाची माहिती संबंधित कंपनीला द्यावी, असे आवाहनही प्रशासनाने केले आहे. गारपिटी, पावसामुळे अकोला तालुक्यात १२ हजार ५४५ हेक्टर, बार्शीटाकळी १ हजार ७४, मूर्तिजापूर २ हजार ६०० आणि बाळापूर तालुक्यात ९ हजार ५७१ तर पातूर तालुक्यात १६० असे एकूण २५ हजार ९५० हेक्टरवरील पिके बाधित झाली आहेत. 

‘शेतकऱ्यांनी खचून जाऊ नये’

अवकाळी पाऊस व गारपिटीने ज्या शेतकऱ्यांचे तसेच नागरिकांचे नुकसान झाले असेल तर खचून जाऊ नये, शासन शेतकऱ्यांच्या पाठीशी खंबीरपणे उभे आहे, असा दिलासा पालकमंत्री बच्चू कडू यांनी गारपीटग्रस्त शेतकऱ्यांना दिला.