परभणी : यंदाच्या खरिप हंगामात जिल्ह्यात ५ लाख १९ हजार ३२२ हेक्टरवर (१००.४२ टक्के) पेरणी झाली आहे. पंतप्रधान पीक विमा योजनेअंतर्गंत शेतकऱ्यांनी ७ लाख १२९ विमा प्रस्ताव दाखल केले. त्याद्वारे ३ लाख ७६ हजार ८१ हेक्टरवरील पिकांसाठी ३२ कोटी ९० लाख १४ हजार ६२४ रुपये विमा हप्ता भरला. १ हजार ४८५ कोटी ३२ लाख ५ हजार ८५५ रुपयाचे विमा संरक्षण घेतले. सोयाबीन, मूग, उडीद, ज्वारी, बाजरी या पिकांच्या पेरणी क्षेत्रापेक्षा विमा संरक्षित क्षेत्र जास्त आहे. तर, कपाशी, तूरीच्या लागवड क्षेत्रापेक्षा विमा संरक्षित कमी आहे. 

यंदा जिल्ह्यातील १ लाख ६६ हजार ७७२ हेक्टरवरील कपाशी आणि ८७९ हेक्टरवरील तूरीला विमा सरंक्षण घेतलेले नाही. खरिप पीकविमा योजने अंतर्गंत गतवर्षी (२०१९-२०) शेतकऱ्यांनी ८ लाख २१ हजार ६८७ विमाप्रस्ताव दाखल करुन ४ लाख ३० हजार ४३५ हेक्टरवरील पिकांसाठी विमा संरक्षण घेतले होते. त्या तुलनेत यंदा १ लाख २१ हजार ५५८ विमा प्रस्ताव कमी दाखल केले आहेत. यंदा ७ हजार ३८० कर्जदार, तर ६ लाख ९२ हजार ७४९ बिगर कर्जदार शेतकऱ्यांनी विमा प्रस्ताव सादर केले.

तालुकानिहाय एकूण पेरणीक्षेत्रापेक्षा विमा संरक्षित क्षेत्र कमी आहे. परंतु, पीकनिहाय पेरणी क्षेत्रापेक्षा विमा संरक्षित क्षेत्र जास्त असलेल्या पिकांमध्ये सोयाबीन ३ हजार ३४९ हेक्टर, मूग १५ हजार ३८५ हेक्टर, उडीद १ हजार ४९० हेक्टर, ज्वारी ४ हजार ३३ हेक्टर, बाजरी १ हजार ६५८ हेक्टरने जास्त आहे. पेरणीक्षेत्रापेक्षा विमा संरक्षित क्षेत्र जास्त असलेल्या पिकांचा विमा परतावा मंजूर करताना क्षेत्र सुधार गुणांक लागू शकतो. त्यामुळे प्रतिहेक्टरी परतावा कमी दराने मिळू शकतो.

पिकांच्या नुकसानीची माहिती शेतकऱ्यांनी ७२ तासांच्या आत पीकविमा मोबाईल अॅपव्दारे किंवा रिलायन्स जनरल इन्सूरंन्स कंपनीच्या १८००१०२४०८८, १८००३००२४०८८ या क्रमांकावर कळावावी.

- संतोष आळसे, जिल्हा अधीक्षक कृषी अधिकारी, परभणी.