सोलापूर ः ‘‘गेल्या दहा महिन्यांपासून एकदाही वीजबिल न भरणाऱ्या पश्चिम महाराष्ट्रातील घरगुती, वाणिज्यिक व औद्योगिक वर्गवारीतील १४ लाख २९ हजार ८११ ग्राहकांचा वीजपुरवठा खंडित करण्याची कारवाई पुढील तीन आठवड्यात करण्यात येईल’’, असे निर्देश महावितरणचे पुणे प्रादेशिक संचालक अंकुश नाळे यांनी दिले.

पश्चिम महाराष्ट्रामध्ये वीजबिलांच्या थकबाकीसह इतर मुद्द्यांचा आढावा घेण्यासाठी नुकतीच बैठक झाली. पुणे परिमंडलाचे मुख्य अभियंता सचिन तालेवार आदी उपस्थित होते. 

सद्यःस्थितीत पुणे (१०३२.८० कोटी), सातारा (१४०.३६ कोटी), सोलापूर (२५९.१२ कोटी), सांगली (१९२.५४ कोटी) व कोल्हापूर (३३७.४३ कोटी) जिल्ह्यांमध्ये घरगुती, वाणिज्यिक व औद्योगिक ग्राहकांकडे एकूण १९६२ कोटी २७ लाख रुपयांची थकबाकी आहे. त्यापैकी १२४७ कोटी ४९ लाख रुपयांची थकबाकी असणाऱ्या १४ लाख २९ हजार ८११ वीजग्राहकांनी गेल्या १ एप्रिल २०२० पासून एकाही महिन्याचे वीजबिल भरलेले नाही. 

कृषिपंप वीजजोडणीबाबत जनजागृती करा  पश्चिम महाराष्ट्रात ज्या ठिकाणी पायाभूत वीज वितरण यंत्रणा उभारण्याची गरज नाही, अशा ठिकाणच्या व कोटेशन भरलेल्या घरगुती, वाणिज्यिक व औद्योगिक नवीन वीजजोडण्या येत्या आठवड्याभरात कार्यान्वित कराव्यात. कृषीपंप वीजजोडणी धोरण २०२० मधील विविध योजनांसाठी जनजागृती करा, त्याबाबतची माहिती कृषी ग्राहक, सहकारी संस्था, बचत गट, गावपातळीवरील संस्था, ग्रामपंचायतींना प्रत्यक्ष भेटीद्वारे देण्याची सूचनाही नाळे यांनी केली.