सिंधुदुर्गनगरी ः जिल्ह्यातील ३७ भातखरेदी केंद्रांवर आतापर्यंत १० हजार क्विंटल खरेदी करण्यात आले असून, अजूनही मोठ्या प्रमाणात भात खरेदी शिल्लक आहे. त्यासाठी १ लाख बारदानाची गरज असल्याची मागणी जिल्हा बँकेचे अध्यक्ष सतीश सावंत यांनी सहकारमंत्री बाळासाहेब पाटील यांच्याकडे केली आहे. 

किमान आधारभूत खरेदी योजनेअंतर्गत जिल्ह्यात भात खरेदी सुरू आहे. जिल्हाधिकाऱ्यांनी मंजूर केलेल्या ४९ पैकी ३७ केंद्रांवर भात खरेदी सुरू झाली आहे. जिल्हा व तालुका खरेदी- विक्री संघामार्फत भाताची खरेदी सुरू आहे. भात खरेदी केंद्रावर ५९ हजार ५०० नवीन बारदाना, तर दुबार वापरलेली ३९ हजार ९७५ अशी एकूण ९९ हजार ४७५ बारदानाचे वाटप केले आहे. आतापर्यंत १० हजार क्विंटल भात खरेदी करण्यात आला. अजून मोठ्या प्रमाणात जिल्ह्यात भातखरेदी होणार आहे. त्यासाठी १ लाख बारदानाची गरज भासणार आहे. हे बारदाना मार्केटिंग फेडरेशनला वेळेत मिळावे, या मागणीचे निवेदन सावंत यांनी सहकारमंत्री पाटील यांची भेट घेऊन दिले.  सहकारमंत्र्यांची सूचना  सहकारमंत्री पाटील यांनी तत्काळ संबंधित यंत्रणेला मार्केटिंग फेडरेशनला बारदाना पुरविण्याची सूचना केली. एका गावात १० टनांपेक्षा जास्त भात उपलब्ध असेल, तर कंपनी थेट गावात जाऊन खरेदी करील. एक शेतकरी आपल्या सातबारावर पाच टनांपर्यंत भात विक्री करू शकतो, असेही चर्चेवेळी मंत्री पाटील यांनी स्पष्ट केल्याचे सावंत यांनी सांगितले.