पुणे   : शासनाकडून कोरोना प्रतिबंधित क्षेत्र वगळून जिल्हा परिषदेच्या शाळा सुरू करण्याचा निर्णय झाल्यास, शाळा सुरू करण्याबाबत आवश्यक ती पूर्वतयारी करण्यात येत आहे. शाळा व्यवस्थापन समितीची बैठक घेऊन मे अखेरपर्यंत प्रत्येक शाळेचा स्वतंत्र आराखडा तयार करावा, अशा सूचना शाळांना देण्यात आल्याची माहिती उपाध्यक्ष रणजित शिवतरे यांनी दिली.

जिल्हा परिषदेच्या शिक्षण समितीची बैठक गुरुवारी (ता.२१) व्हिडीओ कॉन्फरन्सिंगद्वारे झाली. वीसपेक्षा कमी पटाच्या व दुर्गम भागातील शाळा सुरू करण्यासाठी उपलब्ध वर्ग खोल्या आणि शिक्षकांची माहिती घेऊन गरजेनुसार पर्यायी खोल्या उपलब्ध होतील का याबाबतची माहिती मागविण्यात आली आहे. ज्या शाळा सुरू करण्यापूर्वी इमारतीचे निर्जंतुकीकरण करणे, विद्यार्थ्यांना मास्क आणि सॅनिटायझर पुरवणे, हॅण्ड वॉश, दोन विद्यार्थ्यांमध्ये अंतर ठेवण्याच्या नियमांचे पालन करण्यासाठी पूर्वतयारीच्या सूचना करण्यात आल्या.

प्रतिबंधित क्षेत्रामध्ये पुढील शैक्षणिक वर्षात १५ जूनला शाळा सुरू झाल्या नाही तर अशा शाळांमध्ये डिजीटल माध्यमाद्वारे विद्यार्थ्यांचा अभ्यास घ्यावा लागेल, त्यासाठी विद्यार्थ्यांच्या किती पालकांकडे अ‍ॅड्रॉईड मोबाईल, इंटरनेट कनेक्शन सुविधा, डिश टीव्ही कनेक्शन उपलब्ध आहे याची माहिती गोळा सूचना अधिकाऱ्‍यांना देण्यात आल्या. जिल्ह्यामध्ये वादळी पावसामुळे ज्या शाळांचे नुकसान झाले आहे. अशा शाळांच्या दुरुस्तीचे प्रस्ताव अंदाजपत्रकासह मागवण्यात आले आहेत. त्यामुळे या शाळांची दुरूस्ती पावसाळ्यापूर्वी करणे शक्य होणार आहे. या बैठकीत भोरमधील आठ शाळांच्या दुरूस्तींना मंजुरी देण्यात आल्याचे शिवतरे यांनी सांगितले.