पुणे : अन्न व नागरी पुरवठा विभागाच्‍या निर्णयाप्रमाणे आत्मनिर्भर भारत सहाय्य पॅकेजांतर्गत राज्य योजनेत समाविष्ट नसलेल्या विना शिधापत्रिकाधारकांना मे व जून या दोन महिन्यांच्‍या कालावधीकरिता पाच किलो तांदूळ वितरीत करण्‍यात येणार असल्‍याची माहिती जिल्‍हाधिकारी नवल किशोर राम यांनी दिली आहे.

विना शिधापत्रिकाधारक लाभार्थ्यांना ऑफलाइन पध्‍दतीने धान्य वितरण करण्यात येणार आहे. अशा लाभार्थ्यांना त्यांचे आधारकार्ड क्रमांक किंवा कोणतेही शासकीय ओळखपत्र सादर करणे आवश्यक आहे. त्याची पुराव्यादाखल स्वतंत्र नोंद करण्‍यात येईल. केंद्र शासनाच्या निर्देशानुसार पुणे व पिंपरी-चिंचवड शहरासाठी एकूण ११३ अन्नधान्य वितरण केंद्रे निश्चित करण्यात आलेली आहेत. यातून १ लाख ३९ हजार ८८२ लाभार्थ्यांना मोफत तांदूळ वितरीत करण्यात येणार आहे. यासाठी संबंधित परिमंडल अधिकारी, तलाठी, स्थानिक नगरसेवक व अन्नधान्य वितरण केंद्रे यांच्‍यामार्फत विना शिधापत्रिकाधारकांना विहीत नमुन्यातील अर्ज वाटप केले जाणार आहेत.

विना शिधापत्रिकाधारकांनी विहीत नमुन्यात भरलेले अर्ज नजीकच्‍या अन्नधान्य वितरण केंद्रात ३० मेपर्यंत जमा करावयाचे आहेत. ज्या अन्नधान्य वितरण केंद्रामध्ये विना शिधापत्रिकाधारक अर्ज भरुन देतील त्याच अन्नधान्य वितरण केंद्रातून संबंधितास अन्नधान्याचे वितरण करण्‍यात येईल. अन्नधान्य घेताना या अर्जाची पोच सोबत आणणे आवश्यक असल्‍याचेही जिल्‍हाधिकारी राम यांनी कळविले आहे. जास्तीत जास्त लाभार्थ्यांनी आपले अर्ज ३० मेपर्यंत जमा करावे, असे आवाहन अन्नधान्य वितरण अधिकारी अस्मिता मोरे यांनी केले आहे.