मुंबई  : राज्यात दूध, अंडी, मांस व लोकर उत्पादनवाढीसाठी नवीन योजना राबवावी. यामुळे राज्यात असलेली दूध, अंडी आणि मांसाची तूट भरून निघेल आणि शेतकऱ्यांची आर्थिक उन्नती होण्यास मदत होईल, असे निर्देश मुख्यमंत्री उद्धव ठाकरे यांनी दिले

पशुसंवर्धन, दुग्धविकास व मत्स्यव्यवसाय विभागांची आढावा बैठक मुख्यमंत्री ठाकरे यांच्या अध्यक्षतेखाली मंत्रालयात मंगळवारी (ता. १४) झाली. या वेळी ते बोलत होते. बैठकीस पशुसंवर्धन व दुग्ध विकास मंत्री सुनील केदार, मत्सव्यवसाय विकास मंत्री अस्लम शेख, पदुम राज्यमंत्री दत्तात्रय भरणे, परिवहन आणि संसदीय कार्यमंत्री ॲड. अनिल परब, खासदार विनायक राऊत, आमदार रवींद्र वायकर, सुनील प्रभू, पशुसंवर्धन, दुग्धविकास, मत्स्यव्यवसाय विभागाचे प्रधान सचिव अनुप कुमार, मत्स्य व्यवसाय विभागाचे आयुक्त राजू जाधव, पशुसंवर्धन आयुक्त नरेंद्र पोयाम, पशुसंवर्धन अतिरिक्त आयुक्त डॉ. धनराज परकाळे, शेळी मेंढी महामंडळाचे व्यवस्थापकीय संचालक डॉ. महेश बनसोडे, सहसचिव माणिक गुट्टे उपस्थित होते.

श्री. ठाकरे म्हणाले, की पशुपैदास धोरण राबवताना कृत्रिम रेतनाद्वारे पशुधनामध्ये अनुवंशिक सुधारणा घडवून उत्पादन वाढवण्यावर भर द्यावा. शेतकरी व गरजू लाभार्थ्यांना दुधाळ जनावरे, शेळी गट, कुक्कुटपक्षी वाटप करून पूरक उत्पन्नाचे साधन उपलब्ध करून द्यावे. पशुधनास लागणारे वैरण व पशुखाद्याची उपलब्धता वाढवावी. पशुधनास लागणाऱ्या लसींची निर्मिती करावी. शेतकऱ्यांच्या वैयक्तिक लाभाच्या योजनांची व्यापकता वाढवावी. कोकणातील आनंदवाडी मत्स्य प्रकल्पाप्रमाणे राज्यात प्राधान्यक्रम ठरवून प्रकल्पांचा आराखडा तयार करावा. मत्स्य प्रकल्पांसाठी पायाभूत सुविधा विकसित कराव्यात. तसेच मासेमारीसाठी एलईडीचा वापर टाळण्यासाठी पोलिसांची मदत घेण्यात यावी, असेही ठाकरे यांनी स्पष्ट केले.