सोलापूर  ः पंढरपुरात श्री विठ्ठल - रुक्मिणी मातेच्या गाभाऱ्यात ३१०० रत्नागिरी हापूस आंब्यांनी व आंब्याच्या पानांनी आकर्षक अशी आरास करण्यात आली. त्यामुळे गाभाऱ्यास मनमोहक असे आमराईचे स्वरूप प्राप्त झाले.

वैशाख संकष्टी चतुर्थी निमित्ताने पंढरपूरच्या श्री विठ्ठल रुक्मिणी मंदिरामध्ये आंब्याची ही नेत्रदीपक आरास करण्यात आली आहे. रत्नागिरी येथून खास मागविण्यात आलेल्या ३१०० हापूस आंब्यांनी ही आरास केली आहे. श्री विठ्ठलाचा गाभारा, चौखांबी आदी ठिकाणी आंब्यांची आरास करण्यात आल्याने श्री विठ्ठल आमराईत उभा असल्याचा भास होत असून, देवाचे हे लोभस रुप रविवारी अधिकच खुलून दिसत होते. श्री विठ्ठला प्रमाणे श्री रुक्मिणी मातेच्या गाभाऱ्यातही आंब्यांची मनमोहक अशी आरास करण्यात आली आहे.

‘कोरोना’चे जगावर ओढावलेले संकट दूर करण्याची भावना ठेवून विठ्ठलभक्त हरीश बैजल (अतिरिक्त पोलीस महानिरीक्षक, महाराष्ट्र सायबर सेल) अजय सालुखे (उद्योगपती, पुणे), उमेशभाई भुवा (सांगली), दिपकभाई शहा (सांगली), सुनील उंबरे (पंढरपूर) या भक्तांनी आंब्यांची ही पूजा अर्पण केली आहे.