केरळ राज्यामध्ये गेल्या २५ वर्षांपासून कार्यरत सेंद्रिय शेतकऱ्यांच्या केरळ जैव कार्षका समिती या गटाला नावीन्यपूर्ण सेंद्रिय शेतीचा मानाचा जागतिक पुरस्कार जाहीर झाला आहे. चीन येथील क्षीचोंग नगरपालिका आणि दक्षिण कोरिया येथील इंटरनॅशनल फेडरेशन ऑफ ऑर्गनिक अॅग्रिकल्चर मूव्हमेंट (IFOAM), आशिया यांच्या वतीने गुरुवारी (ता. ३०) समितीला देण्यात आला. ५००० अमेरिकी डॉलर आणि सुवर्णपदक असे या पुरस्काराचे स्वरूप आहे. गेल्या २५ वर्षांपासून कार्यरत असलेल्या केरळ जैव कार्षका समितीचे सुमारे १५ हजार शेतकरी सदस्य आहेत. समितीचे कामकाज लोकशाही पद्धतीने चालवण्यात येते. त्याचप्रमाणे संस्थेची आर्थिक निधी गोळा करण्याची पारदर्शक पद्धत अवलंबण्यात येते. या दोन महत्त्वाच्या कारणांमुळे हा आंतरराष्ट्रीय पुरस्कार मिळाला असल्याची माहिती समितीचे राज्य सचिव अशोककुमार व्ही. यांनी दिली. ते पुढे म्हणाले, की या समितीमध्ये अल्पभूधारकांसह मोठे शेतकरी असून, भाजीपाला, अन्नधान्य उत्पादनासाठी नगदी पिकेही घेतात. समितीचे कामकाज चालवण्यासाठी अध्यक्ष, सदस्य व संचालक म्हणून यातील शेतकऱ्यांची निवड होते. त्याचप्रमाणे प्रत्येक जिल्ह्याचे प्रतिनिधित्व येईल, असे पाहिले जाते. सर्व शेतकरी एकत्र येऊन सेंद्रिय शेती पद्धती आणि संबंधित समस्येवर चर्चा करून मार्ग काढतात. त्यानंतर प्रत्येक पंचायत, तालुका, जिल्हा आणि राज्य पातळीवर संघटनात्मक पदे लोकशाही पद्धतीने निवडली जातात. अन्य बहुतांश शेतकरी गट हे स्वयंसेवी पद्धतीने काम करतात. त्यांच्या विविध कार्यक्रमांसाठी देणग्या स्वीकारल्या जातात. अशा वेळी समितीमार्फत सदस्यांकडून वर्गणी काढून असे कार्यक्रम केले जात असल्याची माहिती दिली. नावीन्यपूर्णता