कालव किंवा कवचधारी अपृष्ठवंशीय प्रजातींचा आहारामध्ये वापर मोठ्या प्रमाणात वाढत आहे. अमेरिकेमध्ये या प्रजातींच्या विक्रीने ३२९ दशलक्ष डॉलरचा टप्पा गाठला आहे. मात्र, ते कच्च्या किंवा अर्ध कच्च्या स्वरूपामध्ये खाण्यात आल्यास त्यातील जिवाणूंमुळे माणसांच्या जिवावरही बेतू शकते. यासाठी कारणीभूत व्हिब्रियो प्रजातींच्या विविध जिवाणूंना रोखण्यासाठी अमेरिकी कृषी संशोधन सेवेमध्ये जैविक पद्धतीवर संशोधन करण्यात येत आहे. त्यामुळे शेलफिश उद्योगामधील नुकसान कमी करणे शक्य होणार आहे.

चविष्ठ आणि पोषक घटकांनी परिपूर्ण असलेले अपृष्ठवंशीय कवचधारी प्राणी सागर तळाशी वाळूमध्ये वाढतात. त्यातील शेलफिश हे ब्रॅकीश आणि खाऱ्या पाण्याच्या पर्यावरणातील महत्त्वाचे घटक आहेत. पर्यटनालाही कालव आधारीत पदार्थांमुळे चालना मिळत आहे. मात्र, हे पदार्थ तयार करताना अत्यंत काळजीपूर्वक करावे लागतात. कारण कच्च्या किंवा अर्ध कच्च्या स्वरूपामध्ये शेलफिश खाण्यात आल्यास त्यातून पसरणाऱ्या जिवाणूजन्य आजारांचा उद्रेक होण्याच्या घटना या आधीही घडलेल्या आहेत. शेलफिशमध्ये आढळणाऱ्या व्हिब्रियो पॅराहॅमोलिटीकस (Vibrio parahaemolyticus) या जिवाणूमुळे दरवर्षी सुमारे ८० हजार जणांना व्हिब्रिऑसिसची बाधा होत असल्याचे ‘सेंटर फॉर डिसीस कंट्रोल अॅण्ड प्रिव्हेन्शन’ या संस्थेच्या अहवालात म्हटले आहे. त्यातील व्हिब्रियो व्हल्निफिकस ही वेगळी प्रजाती माणसांच्या मृत्यूला कारणीभूत ठरते. साधारणपणे दर वर्षी अशा शंभर घटना घडतात.

अन्य शत्रूंचा शोध