कऱ्हाड, जि. सातारा  ः ‘कोरोना’चा संसर्ग रोखण्यासाठी सध्या नागरिकांकडून मास्क, सॅनिटायझरचा मोठ्या प्रमाणात वापर होत आहे. बाजारपेठेत सॅनिटायझरची कमतरता जाणवत असल्याने सहकारी साखर कारखान्यांनी आता सॅनिटायझर निर्मितीसाठी पुढाकार घेतला आहे. सह्याद्री कारखान्याने सॅनिटायझर निर्मिती केली आहे. सर्वसामान्य नागरिकांना परवडेल अशा किंमतीत सह्याद्री कारखान्याचे हॅन्ड सॅनिटायझर लवकरच बाजारपेठेत उपलब्ध होणार आहे.

‘कोरोना’चा प्रादुर्भाव रोखण्यासाठी दिवसातून दर दोन तासांनी हात धुवा, हॅन्ड सॅनिटायझरचा वापर करण्यासंदर्भात जनजागृती केली जात आहे. मात्र ‘कोरोना’चा पहिला रूग्ण सापडल्यानंतर बाजारपेठेत मास्क व हॅन्ड सॅनिटायझरची कमतरता जाणवू लागली. यास्थितीत सर्वसामान्यांना हॅन्ड सॅनिटायझर मिळावे, यासाठी काही साखर कारखान्यांनी पुढाकार घेतला आहे. यात सहकारमंत्री बाळासाहेब पाटील अध्यक्ष असलेल्या सह्याद्री कारखान्यानेही सॅनिटायझरचे उत्पादन घेतले आहे. अल्कोहोल व त्यावर प्रक्रिया करून तयार करण्यात आलेले सॅनिटायझर विविध रंगात उपलब्ध करून दिले जाणार आहे, अशी माहिती कारखान्याच्या सूत्रांनी दिली.