Akola News : तुरीचा दर येथील कृषी उत्पन्न बाजार समितीत १० हजार रुपयांकडे निघाला आहे. शनिवारी (ता.१५) तुरीचा कमाल दर १० हजार २०५ रुपये एवढा होता. तर किमान दर ८ हजार ७०० आणि सरासरी दर ९ हजार ३०० रुपये मिळाला. तुरीची आवक सध्या ४०० पोत्यांवर होत आहे.

गेल्या काही दिवसांत तुरीच्या दरात स्थिरता आली होती. तुरीवर साठवणूक मर्यादा लावल्यानंतर बाजारात दर खाली येण्याची चिन्हे होती. मात्र उत्पादनातील घटीमुळे तुरीचा भाव पुन्हा सुधारत आहे. येथील बाजार समितीत कमाल दराने १० हजारांचा पल्ला गाठला आहे.

या हंगामातील तुरीची अद्याप लागवड होत आहे. जिल्ह्यात तुरीचे सरासरी ५५ हजार हेक्टर क्षेत्र आहे. त्यापैकी आतापर्यंत ३८ हजार हेक्टरवर पेरणी आटोपली आहे. अद्यापही १७ ते १८ हजार हेक्टरवरील पेरणी व्हायची आहे.

मध्यंतरी पाऊस नसल्याने पेरण्या खोळंबल्या होत्या. आता हंगाम सुरु होऊन जवळपास दीड महिना लोटला. हा विलंब पाहता तुरीचे लागवड क्षेत्र कमी होईल की काय अशी शंका आहे. येत्या आठवड्यात तुरीच्या लागवडीचा कौल स्पष्ट होऊ शकेल.

वाशीम जिल्ह्यातही बहुतांश महत्त्वाच्या बाजार समित्यांत तुरीला १० हजारांपर्यंत दर मिळतो आहे. वाशीम, रिसोड, मंगरूळपीर, कारंजा, मालेगाव हे प्रमुख बाजार असून प्रत्येक ठिकाणी सध्या मागील काही दिवसांच्या तुलनेत कमी आवक आहे. यामुळेही दर वाढत असल्याची शक्यता वर्तविण्यात येत आहे.

दर आणखी सुधारण्याची शक्यता

बाजारात सध्या जुनी तूर विक्रीसाठी येत आहे. नवीन तुरीची आवक सुरु व्हायला अजून किमान पाच ते सहा महिन्यांचा अवधी लागेल. सध्या बाजारातील आवक कमी झाली आहे. बहुतांश माल विकून झाल्याने येत्या काळात तुरीचा दर आणखी सुधारण्याची शक्यता नाकारता येत नाही.