Sangli News : तासगाव बाजार समितीत चिंचेचा हंगाम अंतिम टप्प्यात आला आहे. चिंचेची आवक मंदावली असली तरी दर टिकून आहेत. हंगाम सुरू झाल्यापासून १००० पोत्यांची (एक पोते ५० किलोचे) विक्री झाली आहे. येत्या पंधरा दिवसापर्यंत दर स्थिर राहतील, असा अंदाज व्यापाऱ्यांनी व्यक्त केला आहे.
गतवर्षी पाऊसमान कमी होते. याचा फटका चिंचेच्या उत्पादनावर झाला आहे. त्यामुळे यंदाच्या हंगामात चिंचेचे उत्पादन ३० टक्क्यांनी घटेल, असा अंदाज व्यापाऱ्यांनी व्यक्त केला. त्यामुळे बाजार समितीत चिंचेची आवक कमी आहे. हंगामाच्या सुरवातीला ६० ते ७० पोत्यांची आवक झाली.
फेब्रुवारीच्या मध्यापासून चिंच काढणीला गती आली. त्यामुळे चिंच आवकेत वाढ झाली. तासगाव बाजार समितीत दर बुधवारी चिंचेचे सौदे होतात. आठवड्याला १५० ते २०० पोत्यांची आवक होत होती. चिंचेची आवक वाढली असली तरी गतवर्षीच्या तुलनेत ती कमीच राहिली. त्यामुळे चिंचेचे दर हंगामाच्या प्रारंभापासून टिकून राहिले. त्यामुळे चिंच उत्पादकांना दर वाढीचा फायदा झाला.
एप्रिलच्या शेवटच्या आठवड्यापासून चिंच हंगाम अंतिम टप्प्याकडे आला. त्यामुळे आवक कमी झाली. सध्या बाजार समितीत आठवड्याला ५० पोत्यांची आवक होत असून तेवढ्याच पोत्यांची विक्री होत आहे. दर स्थिर आहेत.
सध्या वाढत्या उष्णतेमुळे चिंचेचा रंग बदलू लागला आहे. त्यामुळे त्याचा परिमाण येत्या काळात दरावर होण्याची शक्यताही व्यापाऱ्यांनी वर्तविली. तासगावात चिंचेला प्रतिक्विंटल ७३०० ते ८५०० रुपये असा दर मिळत आहे. अघडन चिंचेचे दर टिकून आहेत. या चिंचेला प्रति १९०० ते २००० रुपये दर आहे.
यंदाचा चिंचेचा हंगाम साडेतीन महिने चालला आहे. हंगाम अंतिम टप्प्यात आला आहे. सध्या दर टिकून आहेत. परंतु वाढत्या उष्णतेचा फटका चिंचेला बसू लागला असून चिंचेचा रंग बदलू लागला आहे. त्याचा परिणाम दरावर होईल.- कुमार शेटे, चिंच व्यापारी, तासगाव.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.