Solapur News : सोलापूर कृषी उत्पन्न बाजार समितीमध्ये बेदाण्याच्या आवकीत वाढ सुरूच आहे. चालू आठवड्यात ५०० टन इतका बेदाणा विक्रीसाठी दाखल झाला होता. यामध्ये प्रति किलो ४०१ रुपये इतका कमाल दर मिळाला. कमी दर्जाच्या बेदाण्यालाही प्रति किलो दीडशे रुपये इतका दर राहिला.

सहा वर्षांच्या खडतर कालावधीनंतर द्राक्ष उत्पादकांना समाधानाचे दिवस आल्याचे दिसत आहे. सध्या बेदाणा बाजार तेजीत असून हंगामाच्या सुरुवातीपासूनच दरामध्ये तेजी दिसून येत आहे.

गुरुवारी बाजार समितीमध्ये झालेल्या विक्रीमध्ये दक्षिण सोलापूर तालुक्यातील शेतकरी सोमनाथ माळी यांच्या ४८ बॉक्स बेदाण्याला सर्वांत जास्त भाव मिळाला. बेदाण्याच्या दरामध्ये गत आठवड्याच्या तुलनेने चालू आठवड्यात प्रति किलो ५० रुपये इतकी वाढ दिसून आली आहे.

घटलेले द्राक्ष उत्पादनातील क्षेत्र, त्याचबरोबर वांज द्राक्ष बागांचे वाढलेले प्रमाण यामुळे यावर्षी बेदाणा उत्पादन घटले आहे. याउलट देशांतर्गत बाजारामध्ये बेदाण्याला चांगली मागणी आहे.

बेदाणा दराची स्थिती

चालू आठवड्यातील आवक : ५०० टन

कमाल दर : ४०१ रुपये प्रति किलो

किमान दर : १५० रुपये प्रति किलो

गत आठवड्यात

एकूण आवक : ५०० टन

कमाल दर : ३५० रुपये प्रति किलो

किमान दर : १३० रुपये प्रति किलो