Latur News : दिवाळी सणाचा उत्साह सुरू असतानाचा बाजाराच सोयाबीनची आवक वाढली असून दोन दिवसांत पंधरा हजार क्विंटलने वाढ झाली आहे. सोमवारी (ता. ४) बाजारात ४९ हजार ११ क्विंटल आवक झाली होती. आवक वाढली तरी किमान व कमाल भाव स्थिर आहेत. यात हभीभावाने खरेदीसाठी अजून म्हणावा तेवढा वेग आला नसल्याने शेतकऱ्यांना चांगलाच फटका बसत आहे.

मागील तीन वर्षांचा अनुभव लक्षात घेता यंदा सोयाबीनच्या भाववाढीची आशा शेतकऱ्यांना उरली नाही. यामुळे तातडीच्या आर्थिक गरजांसोबत रब्बीच्या पेरणीच्या खर्चासाठी शेतकरी सोयाबीनची विक्री करण्यासाठी पुढाकार घेताना दिसत आहेत. मळणी होताच त्याची साठवणूक न करता ते थेट बाजारात विक्रीसाठी आणले जात आहेत.

बाजारात सोयाबीनला काही दिवसापासून कमाल चार हजार ५६५ तर किमान तीन हजार नऊशे रुपये प्रतिक्विंटल भाव मिळत आहे. कमाल व किमान भाव स्थिर असून दुसरीकडे जिल्ह्यात १४ केंद्र सुरू होऊनही एकाही केंद्रावर हमीभावाने सोयाबीन खरेदीचा उत्साह नाही. बारदाना व मॉईश्चरची कारणे पुढे केली जात आहे.

यातच पाडव्यादिवशी शनिवारी (ता. २) बाजारात ३५ हजार ८७२ क्विंटल आवक झाली होती. कमाल भाव चार हजार ५६५, किमान भाव तीन हजार नऊशेचा भाव सोमवारी (ता. ४) कायम होता. सोमवारी बाजारात यंदाच्या हंगामातील विक्रमी ४९ हजार ११ क्विंटल आवक झाली होती.

दरम्यान मागील वर्षी दिवाळीत सोयाबीनला पाच हजार रुपये क्विंटल भाव मिळाल्याच्या आठवणी शेतकऱ्यांनी सांगितल्या. गेल्यावर्षी नोव्हेंबरमध्ये पहिल्या आठवड्यात सोयाबीनला चार हजार आठशे रुपये प्रतिक्विंटल भाव होता.

दिवाळी पाडव्या दिवशी सोयाबीनला पहिल्यांदाच पाच हजार रुपये क्विंटल भाव मिळाला. तर पाडव्याच्या दुसऱ्या दिवशी १६ नोव्हेंबरला ६४ हजार २६४ क्विंटल सोयाबीनची आवक होऊन कमाल भाव पाच हजार ३५१ तर किमान चार हजार ५६५ रुपये भाव मिळाला होता.