Chana Market Update जिल्ह्यातील हमीभाव (MSP) हरभरा खरेदी (Chana Procurement) उद्दिष्ट पूर्ण झाल्यामुळे जवळपास २५ दिवसांपासून बंद आहे. प्रशासनाने नवीन वाढीव उद्दिष्ट नेमून दिले आहे. त्यानुसार आता सोमवार (ता. ८)पासून पुन्हा हरभरा खरेदी केली जाणार आहे. यासाठी संबंधित खरेदीदार नोडल एजन्सीला जिल्हाधिकाऱ्यांनी निर्देश दिले आहेत.

राज्यातील सात ते आठ जिल्ह्यांत खरेदी उद्दिष्ट पूर्ण झाल्याने हरभरा खरेदी बंद केली होती. यामुळे हजारो शेतकऱ्यांच्या घरात हरभरा पडून आहे. या शेतकऱ्यांमध्ये प्रचंड खळबळ उडाली. यामुळे शासनाने उद्दिष्ट वाढवून द्यावे, यासाठी शेतकरी, लोकप्रतिनिधींनी शासनाकडे मागणी रेटून धरली.

परिणामी, आता शासनाने उद्दिष्ट संपलेल्या जिल्ह्यांना नव्याने उद्दिष्ट वाढवून दिले. त्यानुसार आता बुलडाणा जिल्ह्यात एक लाख ४७ हजार २९६ क्विंटल हरभरा खरेदीचे नवे उद्दिष्ट दिले आहे.

यापूर्वी सुमारे साडे सहा लाख क्विंटल हरभरा खरेदी पूर्ण झालेली आहे. नाफेडमार्फत यावर्षी संबंधित जिल्ह्यातील एकूण उत्पादकतेच्या २५ टक्के हरभऱ्याची खरेदी केली जात आहे. त्यानुसार जिल्ह्याला सहा लाख ५८ हजार क्विंटलचे उद्दिष्ट मिळाले होते.

बुलडाणा जिल्ह्यात केंद्र शासनाच्या आधारभूत किंमत खरेदी योजनेअंतर्गत ‘नाफेड’च्या वतीने हमीदराने हरभरा खरेदी प्रक्रिया राबविली जात आहे.

त्यासाठी सहकारी पणन महासंघ, विदर्भ पणन महासंघ, महाएफपीसी, पृथाशक्ती फार्मर प्रोड्युसर कंपनी, विदर्भ अॅग्रिकल्चर अँड अलाइड प्रोड्यूसर कंपनी, महाकिसान संघ कृषी प्रोड्यूसर कंपनी, महाकिसान वृद्धी अॅग्रो प्रोड्यूसर कंपनी, महास्वराज्य फार्मर प्रोड्यूसर कंपनी अशा ८ नोडल एजन्सी खरेदी प्रक्रिया राबवीत आहेत.

संदेश मिळाल्यावर हरभरा विक्रीस न्यावा

खरेदीचे संदेश ज्या शेतकऱ्यांना मिळाले आहेत, त्यांनी आपला हरभरा संबंधित केंद्रावर विक्रीसाठी न्यावा, अशी सूचनाही करण्यात आली आहे.