Chana Market Update नगर : शेतकऱ्यांच्या शेतीमालाला हमीदर (Chana MSP) मिळावा यासाठी शासनाने हमी केंद्र सुरू केली खरी मात्र, नगर जिल्ह्यात हमी दराने शेतीमाल खरेदीचा (Chana Procurement) बोजवारा उडाल्यासारखी स्थिती आहे.

जिल्हा मार्केटिंग फेडरेशनने धान्य विक्रीसाठी नोंदणी करण्याचे शेतकऱ्यांना आवाहन केले. परंतु या नोंदणीला शेतकऱ्यांचा अल्प प्रतिसाद आहे. अजून तरी शेतमाल केंद्रावर खरेदी झाल्याचे दिसत नाही.

शेतकऱ्याचा शेतीमाल, विशेषतः तूर, हरभरा, मूग, उडीद, सोयाबीन यांसारखी पिके काढणीनंतर बाजारात आवक वाढताच व्यापाऱ्यांकडून धान्याचे दर वाढले जातात.

त्यामुळे शेतकऱ्याच्या शेतीमालाला किमान हमीदर मिळावा म्हणून शासनाकडून दरवर्षी केंद्रे सुरू करून शेतीमालाची खरेदी केली जाते.

यंदा तूर, हरभरा खरेदीसाठी नगर जिल्ह्यामध्ये एकरुखे (राहता), बोधेगाव (शेवगाव), जामखेड, कोपरगाव, कर्जत, पारनेर, पाथर्डी, राहुरी, साकत (नगर), मांडवगण (श्रीगोंदा) या दहा ठिकाणी खरेदी केंद्रे सुरू करण्यात आली आहेत.

या केंद्रांवर यंदा एकही क्विंटल तुरीची खरेदी झाली नाही. विशेष म्हणजे तूर विक्रीसाठी एकाही शेतकऱ्याने नोंदणीही केली नसल्याचे दिसून येत आहे.

हरभरा विक्रीसाठी बोधेगाव, पाथर्डी व पारनेर केवळ तीन केंद्रांवर १०९ शेतकऱ्यांनी ऑनलाइन नोंदणी केलेली आहे. मात्र अद्यापपर्यंत एकही क्विंटल हरभऱ्याची खरेदी झाली नाही. विशेष म्हणजे हरभरा, तुरीला हे बाजारात हमीदरापेक्षा कमी दर मिळत आहे.

असे असतानाही हमी केंद्रावर धान्य विक्री करण्यास शेतकरी धजावत नाहीत, याचे कारण काय, हे मात्र कळायला तयार नाही. हमीदराने शेतीमाल विक्रीबाबत शेतकरी नोंदणी करत नाहीत आणि विक्रीही करत नाहीत. त्यामुळे नगर जिल्ह्यात हमी दराने धान्य खरेदीचा बोजवारा उडाल्याचे दिसून येत आहे.