Jalgaon News : खानदेशात दर्जेदार, निर्यातक्षम केळीला शिवार किंवा थेट खरेदीत कमाल ३२०० रुपये प्रतिक्विंटलपर्यंतचा दर मिळत आहे. तर किमान दर २१०० रुपये प्रतिक्विंटलपेक्षा अधिक आहेत. आवक कमी झाली असून, उठाव वाढला आहे.

दर्जेदार केळी सध्या जळगाव जिल्ह्यातील चोपडा, जामनेर, जळगाव, पाचोरा, भडगाव, चाळीसगाव, यावल भागांत आहे. रावेर, मुक्ताईनगर भागांत केळीची आवक अल्प आहे. धुळ्यातील शिरपुरातही केळीची आवक कमी आहे.

नंदुरबारातील आवकही अत्यल्प आहे. खानदेशात मिळून रोज ८० ट्रक (एक ट्रक १६ टन क्षमता) केळीची आवक होत आहे.

आवकेत मागील काही दिवसांत सुमारे १५ ट्रकने घट झाली आहे. दुसरीकडे सणासुदीसह अन्य बाबींमुळे केळीस उठाव आहे.

खानदेशालगत मध्य प्रदेशातही केळीची आवक घटली आहे. बऱ्हाणपुरातही आवक ७० ते ७५ ट्रक प्रतिदिन आहे. तेथेही कमाल २९५० रुपये दर आहे. केळी दरात मागील सात ते आठ दिवसांत किंचित सुधारणा झाली आहे.