Sindhudurg News : जिल्ह्यातील ४१ केंद्रांवर भातखरेदी सुरू असून, आतापर्यंत ४१ हजार ३१६ क्विंटल भातखरेदी झाली आहे. भातविक्रीची १ कोटी रक्कम शेतकऱ्यांच्या खात्यात जमा करण्यात आली आहे. उर्वरित शेतकऱ्यांना रक्कम वितरित करण्याची प्रकिया सुरू आहे.

जिल्ह्यात दरवर्षी नोव्हेंबरमध्ये सुरू होणारी भातखरेदी यावर्षी १० डिसेंबरनंतर सुरू झाली. जिल्ह्यात तालुका खरेदी-विक्री संघ, सहकारी सेवा संस्थांमार्फत भातखरेदी केली जाते. जिल्ह्यात खरेदीची ४१ केंद्रे मंजूर आहेत.

त्यापैकी सुरुवातीचा महिनाभर केवळ २६ केंद्रावरच खरेदी सुरू होती. परंतु गेल्या वीस दिवसांत जिल्ह्यातील सर्वच्या सर्व ४१ केंद्रांवर भातखरेदी सुरू आहे. जिल्ह्यातील ३ हजार ४८ शेतकऱ्यांनी आतापर्यंत ४१ हजार ४१६ क्विंटल भातविक्री केली आहे.

अजूनही भातखरेदी विक्रीची प्रकिया सुरू आहे. दरम्यान, जिल्ह्यातील भात उत्पादकांच्या खात्यात भातविक्रीची १ कोटी रक्कम जमा करण्यात आली आहे.