सोयाबीनमधील मंदी कायम

आंतरराष्ट्रीय बाजारात आणि देशातील बाजारातही मागील आठवडाभरात सोयाबीनमधील मंदी कायम होती. सोयाबीनचा बाजारभाव दबावातच राहीला. वायद्यांमध्ये आंतरराष्ट्रीय बाजारात सोयाबीन आणि सोयापेंडच्या भावात चढ उतार राहीले. शेवटी शुक्रवारी वायदे १०.३६ डाॅलर प्रतिबुशेल्सवर बंद झाले होते. तर सोयापेंडचे वायदे २९६ डाॅलर प्रतिटनांवर बंद झाले. देशात सोयाबीनचा भाव ३ हजार ८०० ते ४ हजार रुपयांच्या दरम्यान होते. तर प्रक्रिया प्लांट्सनी खरेदीचे भाव आजही ४ हजार ३०० ते ४ हजार ४०० रुपयांच्या दरम्यान काढले होते. देशातील खुल्या बाजारातील सोयाबीनची आवक वाढत आहे. सोयाबीनवरील दबाव आणखी काही आठवडे कायम राहील, असा अंदाज सोयाबीन बाजारातील अभ्यासकांनी व्यक्त केला.

कापसाचे भाव स्थिर

कापसाची बाजारातील आवक आणि दरपातळी मागील आठवडाभर स्थिर दिसली. देशात कापसाची आवक सव्वा लाख गाठींच्या दरम्यान राहीली. तर दरपातळी ७ हजार ते ७ हजार ३०० रुपयांच्या दरम्यान राहीली. आजही बाजारात कापूस याच भावाने विकला जात होता. शनिवारी बाजारात आवक कमी राहते. मात्र त्याचा दराला फारसा आधार मिळत नाही. देशातील बाजारात आवक पुढील आठवड्यातही कायम राहण्याचा अंदाज आहे. त्यामुळे दरपातळीही स्थिर दिसू शकते, असा अंदाज कापूस बाजारातील अभ्यासकांनी व्यक्त केला.

कारल्याला चांगला उठाव

राज्यातील बाजारात सध्या कारल्याला चांगला उठाव मिळत आहे. बाजारातील कारल्याची आवक कमी आहे. बाजारातील इतर भाजीपाल्याच्या दराचाही आधार कारल्याला मिळत आहे. कमी आवक आणि चांगल्या मागणीमुळे कारल्याला भावही चांगला आहे. सध्या बाजारात कारली प्रतिक्विंटल ३ हजार ते ३ हजार ५०० रुपयांच्या दरम्यान विकले गेले. कारल्याची आवक यापुढील काळातही कमीच राहण्याचा अंदाज आहे, असे व्यापाऱ्यांनी सांगितले.

बाजरीला चांगली मागणी

बाजरीला थंडीमुळे सध्या काहीशी चांगली मागणी आहे. तर बाजारातील बाजरीची आवक स्थिरावली आहे. यंदाच्या खरिपात बाजरीचे उत्पादन वाढील्याचे अंदाज आहेत. मात्र बाजारीला उठावही चांगला मिळत आहे. त्यामुळे बाजरीचे भाव मागील ३ आठवड्यांमध्ये अनेक बाजारांमध्ये काहीसे सुधारले. आता बहुतांशी बाजारात बाजरीला २५०० रुपयांच्या पुढे दर मिळत आहे. तर सरासरी दरपातळी २ हजार ५०० ते २ हजार ८०० रुपयांच्या दरम्यान होती. रब्बीतील बाजारीची आवक सुरु होईपर्यंत बाजारीचा बाजार टिकून राहू शकतो, असा अंदाज अभ्यासक व्यक्त करत आहेत.

बेदाणाला दरात सुधारणा

लग्नसराई आणि सण समारंभामुळे बेदाण्याला चांगली मागणी आहे. बेदाणा निर्मितीचा हंगाम सुरू होऊन आता दोन महिने झाले. पण बाजारात बेदाण्याची आवक जेमतेमच आहे. यंदा बेदाणा निर्मितीला द्राक्षटंचाई भासू लागली आहे. त्यामुळे बेदाणा निर्मिती संथगतीने सुरू आहे. त्यामुळे मागील पंधरा दिवसांत बेदाण्याच्या दरात प्रति किलोस २५ रुपयांची वाढ झाली आहे. नव्या बेदाण्याला प्रति किलोस १०० ते २५० रुपये दर मिळत आहे. त्यातच फेब्रुवारीच्या शेवटच्या आठवड्यात महाशिवरात्र, त्यानंतर रमजान ईद, होळी सण येत आहेत. या सणानिमित्त देशभरातून बेदाण्याला मोठी मागणी असते. त्यामुळे बेदाण्याला मागणी राहून दरही टिकून राहतील, असा अंदाज बेदणा बाजारातील अभ्यासकांनी व्यक्त केला.