Market Bulletin:

आल्याचे भाव दबावातच

राज्यातील सर्वच बाजारांमध्ये आल्याची आवक वाढली आहे. त्याचा परिणाम आल्याच्या दरावर दिसून येत आहे. सध्या आल्याला उठाव असला तरी वाढत्या आवकेमुळे आल्याचे भाव मागील दोन महिन्यात निम्म्यापेक्षा कमी झाले आहेत. सध्या बाजारात आल्याला प्रतिक्विंटल सरासरी २ हजार ते ३ हजारांच्या दरम्यान भाव मिळत आहे. यंदा आल्याच्या उत्पादनात वाढल्याचेही शेतकरी आणि व्यापारी सांगत आहेत. आल्याची बाजारातील आवक काही आठवडे कायम राहण्याचा अंदाज आहे. त्यामुळे दरातही काहीसे चढ उतार दिसतील, असा अंदाज आले बाजारातील अभ्यासकांनी व्यक्त केला.

हळद दरात चढ उतार

बाजारातील हळदीची आवक सुरु असली तरी वाढत्या मागणीमुळे हळदीच्या भावात सुधारणा दिसून आली. दुसरीकडे हळदीच्या भावात काहीसे चढ उतारही दिसत आहेत. सध्या बाजारात हळदीचा भाव ११ हजार ते १५ हजारांच्या दरम्यान दिसत आहे. हळदीला सध्या मागणीही चांगली आहे. राज्यातील बाजारात हळदीची आवक चांगली राहण्याचा अंदाज आहे. त्यामुळे हळदीच्या भावात काहीसे चढ उतार राहतील, असा अंदाज हळद बाजारातील अभ्यासकांनी व्यक्त केला.

कांदा दबावात

बाजारात कांद्याची आवक वाढली आहे. बाजरात सध्या लाल आणि उन्हाळ कांद्याची आवक दिसत आहे. त्याचा दबाव कांदा दरावर येत आहे. कांद्याचा भाव मागील महीनाभरातच क्विंटलमागे ५०० रुपयांनी कमी झाला. सध्या कांद्याला सरासरी ११०० ते १३०० रुपयांचा भाव मिळत आहे. कांद्याची आवक एप्रिल महिन्यातही चांगली राहण्याचा अंदाज आहे. याचा दबाव दरावर राहील. त्यामुळे सध्याच्या दरपातळीत काहीसे चढ उतार पाहायला मिळू शकतात, असा अंदाज कांदा बाजारातील अभ्यासकांनी व्यक्त केला.

सोयाबीनमध्ये काहीशी सुधारणा

सोयाबीन दरात आजही काहीशी सुधारणा दिसून आली होती. प्रक्रिया प्लांट्सनी आजही सोयाबीन खरेदीच्या भावात सरासरी ५० रुपयांची वाढ केली होती. त्यामुळे प्रक्रिया प्लांट्सचे भाव ४ हजार ४५० ते ४ हजार ६०० रुपयांच्या दरम्यान काढले होते. तर बाजार समित्यांमध्येही खरेदी दरातही क्विंटलमागे ५० रुपयांपर्यंत सुधारणा दिसून आली. आज सोयाबीन ४ हजार ते ४ हजार २५० रुपयाने विकले गेले. देशातील चांगला पुरवठा आणि आंतरराष्ट्रीय बाजारातील मंदी यामुळे दरात मोठ्या वाढीची शक्यता नाही, असे सोयाबीन बाजारातील अभ्यासकांनी सांगितले.

कापूस दरात वाढ

कापसाचे भाव आज काहीसे वाढले होते. बाजारातील कापसाची आवक कमी झाली आणि दुसरीकडे कापसाला उठाव चांगला आहे. त्यामुळे कापसाच्या दरात सुधारणा दिसून आली. कापसाची आवक ७० हजार गाठींच्या दरम्यान होत आहे. उत्पादन घटल्याने आवक पुन्हा कमी होण्याची शक्यता आहे. याचा आधार दराला मिळत आहे. बाजारात कापसाला सरासरी ७ हजार १०० ते ७ हजार ६०० रुपयांच्या दरम्यान भाव मिळाला. बाजारातील कापसाची आवक पुढील आठवड्यापासून आणखी कमी होत जाईल. त्यामुळे कापसाच्या दरालाही आधार मिळेल, असे कापूस बाजारातील अभ्यासकांनी सांगितले.