Share Market Bulletin : देशातील काही बाजारात तुरीच्या भावात काहीशी नरमाई दिसून आली. त्याचे महत्वाचे कारण आहे बाजारात आवक वाढण्याचा अंदाज. सध्या कर्नाटकातील  बाजारात तुरीची आवक वाढली आहे. संक्रांतीनंतर देशातील इतरही बाजारात तुरीचे भाव वाढतील, असा अंदाज व्यक्त केला जात आहे.

याचा परिणाम भावावर दिसून येत आहे. त्यामुळे तुरीच्या भावात क्विंटलमागं ३०० ते ४०० रुपयांची नरमाई दिसून आली. सध्या तुरीचे भाव ८ हजार ३०० ते ९ हजार रुपयांच्या दरम्यान आहेत. पण तुरीला यंदा घटलेले उत्पादन, स्टाॅकीस्टची खरेदी आणि सरकारची बाजारभावाने खेरदीचा आधार आहे. त्यामुळे तुरीच्या भावात पुन्हा सुधारणा होऊ शकते, असा अंदाज तूर बाजारातील अभ्यासकांनी व्यक्त केला. 

आंतरराष्ट्रीय बाजारात सोयाबीन आणि सोयापेंडच्या भावातील नरमाई कायम आहे. सोयाबीन आजही १२.२६ डाॅलर प्रतिबुशेल्सवर होते. तर सोयापेंड आजही ३६२ डाॅलरवर होते. आंतरराष्ट्रीय बाजारातील सोयाबीन भावावर सध्या पुरठ्याच्या अंदाजामुळे दबाव आहे. देशातील सोयाबीनचे भाव आजही ४ हजार ५०० ते ४ हजार ७०० रुपयांवर आहेत.

सोयाबीनच्या भावात आलेली नरमाई कायम असल्याने शेतकरी पॅनिक सेलिंग करतानाही दिसत आहेत. याचा दबाव बाजारावर येताना दिसत आहे. सोयाबीन बाजारातील आवक कमी झाल्यानंतर सोयाबीनच्या दरातही सुधारणा दिसून येऊ शकते, असा अंदाज सोयाबीन बाजारातील अभ्यासकांनी व्यक्त केला. 

देशातील कापसाचे भाव कायम आहेत. बाजारातील होणारी आवक कायम आहे. आजही देशातील बाजारात जवळपास १ लाख ८० हजार गाठींची कापूस आवक झाली होती. त्यापैकी सर्वाधिक आवक तेलंगणात झाली होती. तेलंगणात सीसीआयची खरेदी मोठ्या प्रमाणात सुरु आहे.

यामुळे बाजारातील आवक जास्त राहीली. तर महाराष्ट्रातील आकही चांगली आहे. सध्या कापसाची भावपातळी ६ हजार ६०० ते ७ हजार २०० रुपयांच्या दरम्यान कायम आहे. बाजारातील कापूस आवक कमी होऊन पुढील महिनाभरात कापसाच्या भावातही सुधारणा होऊ शकते, असा अंदाज कापूस बाजारातील अभ्यासकांनी व्यक्त केला. 

मक्याला भावात मागील दोन आठवड्यांमध्ये अनेक बाजारात क्विंटलमागे ५० रुपयांची सुधारणा दिसून आली. यंदा साखरेचे उत्पादन कमी होणार असल्याने इथेनाॅल निर्मितीवर बंधने आली. धान्यामध्ये मक्याची उपलब्धता बऱ्यापैकी आहे. त्यातच तेल कंपन्यांनी मक्यापासून निर्मित मक्याला प्रोत्साहन दिले.

यामुळे मक्याच्या भावात वाढ दिसून आली. सध्या मक्याला प्रतिक्विंटल सरकारी २ हजार २०० ते २ हजार ३०० रुपयांचा भाव मिळत आहे. यापुढील काळात मक्याला मागणी वाढून मक्याचे भाव आणखी वाढू शकतात, असा अंदाज मका बाजारातील अभ्यासकांनी व्यक्त केला. 

बाजारातील हिरव्या मिरचीची आवक दिसेंदिवस कमीच दिसत आहे. बाजारातील आवक कमी असली तरी सणांमुळे मिरचीला उठाव चांगला आहे. यामुळे हिरव्या मिरचीचे भाव गेल्या महिन्याच्या तुलनेत क्विंटलमागं ३०० ते ४०० रुपयांनी वाढले आहेत.

सध्या हिरव्या मिरचीला प्रतिक्विंटल सरासरी ३ हजार ते ३ हजार ५०० रुपयांचा भाव मिळत आहे.हिरव्या मिरचीची आवक पुढील काळात आणखी कमी होण्याची शक्यता आहे. त्यामुळे हिरव्या मिरचीचे भाव आणखी सुधारू शकतात, असा अंदाज मिरची व्यापारी व्यक्त करत आहेत.