१) सोयाबीन स्थिरावले (Soybean Rate)

अमेरिकेच्या कृषी विभागानं अर्थात युएसडीएनं अर्जेंटीनातील सोयाबीन उत्पादन (Soybean production) यंदा ३३० लाख टनांवर स्थिरावेल, असा अंदाज व्यक्त केला. उत्पादनाचा अंदाज आणखी कमी होऊ शकतो. ब्राझीलमधील उत्पादनाचा अंदजा स्थिर ठेवण्यात आला.

युएसडीएच्या अंदाजामुळे आंतरराष्ट्रीय बाजारात सोयाबीन (Soybean) आणि सोयापेंडच्या (Soyameal) दरात काहीशी सुधारणा झाली होती. तर देशातील बाजारात आज सोयाबीनला सरासरी ५ हजार ते ५ हजार ४०० रुपयांचा दर मिळाला.

सध्या सोयाबीन दरात चढ उतार सुरु आहेत. मात्र सोयाबीन दर जास्त दबावात येणार नाहीत, असा अंदाज जाणकारांनी व्यक्त केला.

२) कापूस बाजार सुस्तच (Cotton Rate)

देशातील अनेक बाजारांमध्ये कापसाचा कमाल दर कमी झाला आहे. अमेरिकेच्या कृषी विभागानं भारतातील कापूस उत्पादनाचा अंदाज पुन्हा कमी केला. पण सध्या बाजारातील कापूस आवक वाढली. त्याचा दबाव दरावर येत आहे.

सध्या कापसाला सरासरी ७ हजार ८०० ते ८ हजार २०० रुपयांच्या दरम्यान भाव मिळतोय. मात्र कापसाचे भाव जास्त दिवस दबावात राहणार नाहीत. दर सुधारतील, असा अंदाज कापूस बाजारातील अभ्यासकांनी व्यक्त केला.

३) हरभरा दर दबावात (Chana Rate)

हरभरा दर सध्या दबावातच आहेत. सध्या हरभऱ्याला ४ हजार ६०० ते ५ हजार रुपयांच्या दरम्यान भाव मिळतोय. नाफेडने महाराष्ट्र, गुजरात आणि कर्नाटकातील हरभरा विक्री बंद केली. इतर राज्यांमध्येही लवकरच हरभरा विक्री बंद होईल.

त्यातच उष्णता आणि पावसाचा पिकाला फटका बसतोय. त्यामुळं नाफेडची खरेदी सुरु झाल्यानंतर खुल्या बाजारातील दरही हमीभावाच्या दरम्यान पोहचू शकतात, असा अंदाज व्यापारी व्यक्त करत आहेत.

४) फ्लॉवरला उठाव कमी

फ्लॉवरचे दर सध्या दबावात आहेत. बाजारातील आवक काहीशी वाढल्यानं दरावर दबाव आलाय. मागील काही दिवसांपासून दरात क्विंटलमागं ३०० ते ४०० रुपयांची नरमाई दिसून आली. सध्या फ्लाॅवरला प्रतिक्विंटल सरासरी ५०० ते ९०० रुपयांचा भाव मिळतोय.

पुढील काळात उष्णतेमुळे फ्लाॅवरची आवक कमी होण्याचा आहे. त्यामुळं फ्लाॅवरच्या दरातही सुधारणा दिसू शकते, असा अंदाज भाजीपाला बाजारातील अभ्यासकांनी व्यक्त केसला.

५) तुरीला यंदा काय भाव मिळू शकतो?

देशातील बाजारात सध्या तुरीचे दर तेजीत आहेत. सरकार तुरीच्या दरावर लक्ष ठेऊन आहे. देशात यंदा तुरीचे उत्पादन कमी असल्याचंही सरकारनंही मान्य केलं. पण सरकार आयात करून देशातील तूर उपलब्धता वाढवेल, १० लाख टन तूर आयातीचं सरकारचं उद्दीष्ट असल्याचं सांगितलं जातं.

पण दुसरीकडे व्यापारी आणि उद्योग तूर आयात ८.५ लाख टनांपेक्षा जास्त होण्याची शक्यता कमीच असल्याचं सांगतात. तुरीचा मागील हंगामातील स्टाॅकही कमी आहे. त्यामुळं यंदा तुरीचा तुटवडा जाणवणार आहे. असे व्यापारी सांगत आहेत.

तुरीला यंदा चांगला भाव मिळू शकतो, याची जाणीव असल्यानं शेतकरीही तुरीची विक्री मर्यादीत स्वरुपात करत आहेत. बाजारातील तुरीची आवक सध्या सरीसरीपेक्षा कमी आहे. दुसरीकडे सरकार बाजारात केव्हाही हस्तक्षेप करण्याची शक्यता असल्यानं उद्योग सध्या गुरजेप्रमाणं खरेदी करत असल्याचं दिसतं.

पण आवकेच्या तुलनेत तुरीला मागणी चांगली आहे. त्यामुळं तुरीचे दर तेजीत आहेत. सध्या तुरीला ७ हजार ५०० ते ८ हजार ५०० रुपयांच्या दरम्यान दर मिळाला.

यंदा सरकारनं तुरीच्या बाजारात हस्तक्षेप केला तरी एप्रिलनंतर दरातील तेजी वाढू शकते. तुरीचा सरासरी भाव ८ हजार ते ९ हजार रुपयांच्या दरम्यान राहू शकतो, असाही अंदाज तूर बाजारातील अभ्यासकांनी व्यक्त केला.