Market Bulletin:

आल्याचे भाव दबावात

राज्यातील सर्वच बाजारांमध्ये आल्याची आवक वाढली आहे. त्याचा परिणाम आल्याच्या दरावर दिसून येत आहे. सध्या आल्याला उठाव असला तरी वाढत्या आवकेमुळे आल्याचे भाव मागील दोन महिन्यात निम्म्यापेक्षा कमी झाले आहेत. सध्या बाजारात आल्याला प्रतिक्विंटल सरासरी २ हजार ते ३ हजारांच्या दरम्यान भाव मिळत आहे. यंदा आल्याच्या उत्पादनात वाढल्याचेही शेतकरी आणि व्यापारी सांगत आहेत. आल्याची बाजारातील आवक काही आठवडे कायम राहण्याचा अंदाज आहे. त्यामुळे दरातही काहीसे चढ उतार दिसतील, असा अंदाज आले बाजारातील अभ्यासकांनी व्यक्त केला. 

केळीचे दर टिकून

केळीचे भाव मागील काही आठवड्यांपासून स्थिरावले आहेत. बाजारातील केळीची आवक मधल्या काळात वाढल्यानंतर दरात काहीशी नरमाई आली होती. मात्र रमजान आणि वाढत्या उन्हाबरोबर वाढलेल्या मागणीमुळे केळीच्या दरातही काहीशी सुधारणा दिसून आली. सध्या केळीला बाजारात सरासरी १ हजार ६०० ते २ हजार रुपये प्रतिक्विंटलच्या दरम्यान भाव मिळत आहे. केळीची बाजारातील आवक स्थिर राहील यामुळे तरही टिकून राहण्यास मदत होईल, असा अंदाज केळी बाजारातील अभ्यासकांनी व्यक्त केला. 

कैरीला मागणी

बाजारात कैरी देखील दाखल झाली आहे. पहिल्या टप्प्यातील कैरीला बाजारात पसंती देखील मिळत आहे. सध्या कैरीची आवक मर्यादीत दिसत आहे. तर चांगल्या मागणीमुळे दरही चांगला मिळत असल्याचे शेतकरी सांगत आहेत. सध्या कैरीला गुणवत्ता आणि वाणानुसार प्रतिक्विंटल सरसारी ३ हजार ते ४ हजार रुपये प्रतिक्विंटलचा भाव मिळत आहे. सध्या कैरीचा हंगाम सुरु झाला. पुढील काळात बाजारातील आवक वाढत जाईल आणि दरही कमी होऊ शकतात, असा अंदाज व्यापारी व्यक्त करत आहेत. 

सोयाबीन दबावातच

सोयाबीन आणि सोयापेंडच्या दरात काहीसे चढ उतार सुरुच आहेत. आंतरराष्ट्रीय बाजारात सोयाबीन आणि सोयापेंडच्या दरात काहीशी नरमाई पाहायला मिळाली. सोयाबीनचे भाव कमी होऊन वायदे १०.०१ डाॅलर प्रतिबुशेल्सवर आज दुपारपर्यंत पोचले होते. तर सोयापेंडचे भाव २९४ डाॅलर प्रतिटनांपर्यंत कमी झाले होते. देशात प्रक्रिया प्लांट्सचे खरेदीचे भाव ४ हजार १०० ते ४ हजार २५० रुपयांच्या दरम्यान स्थिर होते. तर बाजार समित्यांमध्ये सोयाबीनला सरासरी ३ हजार ८०० ते ४ हजार रुपयांच्या दरम्यान सोयाबीनला भाव मिळाला. सोयाबीन भावावरील दबाव आणखी काही आठवडे कायम राहील, असा अंदाज बाजारातील अभ्यासकांनी व्यक्त केला.  

कापसाचे दर टिकून

देशातील बाजारात कापसाचे भाव टिकून आहेत. आंतरराष्ट्रीय बाजारात कापसाच्या भावात काहीसे चढ उतार सुरुच आहेत. आज दुपारपर्यंत वायदे ६५.४१ सेंट प्रतिपाऊंडवर पोचले होते. देशातील बाजारात मार्च महिन्यातील आवक कमीच होत आहे. काल देशभरातील बाजारात ७५ हजार गाठींच्या दरम्यान कापसाची आवक झाली होती. तर कापसाला सरासरी ७ हजार १०० ते ७ हजार ४०० रुपयांच्या दरम्यान भाव मिळाला. देशातील कापसाची आवक दिवसेंदिवस होत जाईल. याचा आधार दराला मिळू शकतो, असा अंदाज कापूस बाजारातील अभ्यासकांनी व्यक्त केला.