Market Bulletin:

केळी दरात सुधारणा

केळीला वाढत्या उन्हामुळे उठाव मिळत आहे. बाजारातील केळीची आवक काहीशी अधिक असतानाही मागणी असल्याने केळीच्या भावात सुधारणा दिसून आली. राज्यातील केळीला विशेष मागणी असल्याचे व्यापारी सांगत आहेत. त्यामुळे दरात क्विंटलमागे मागील दोन आठवड्यात २०० रुपयांपर्यंत सुधारणा झाली. सध्या केळी सरासरी १७०० ते २ हजार रुपयांचा भाव मिळत आहे. उशीरा लागवडी झालेल्या केळीची बाजारात सध्या आवक होत आहे. केळीला परराज्यातूनही मागणी आहे. त्यामुळे केळीचे भाव टिकून राहतील, असा अंदाज केळी बाजारातील अभ्यासकांनी व्यक्त केला.

कारलीला मागणी

राज्यातील बाजारात कारल्याची आवक स्थिर आहे. तर दुसरीकडे आल्याला उठाव चांगला आहे. त्यामुळे कारल्याचे भाव टिकून आहेत. कारल्याला सध्या बाजारात सरासरी २ हजार ५०० ते ३ हजार रुपयांच्या दरम्यान भाव मिळत आहेत. कारळ्याची बाजारातील आवक यापुढेही मर्यादीत राहण्याचा अंदाज आहे. तर कारल्याला उठाव चांगला राहील. याचा आधार दराला मिळेल. त्यामुळे कारल्याचे दर आणखी काही आठवडे कायम राहतील, असा अंदाज व्यापारी व्यक्त करत आहेत.

पपईला चांगला उठाव

राज्यातील पपईला सध्या चांगली मागणी आहे. त्यामुळे पपईच्या भावातील तेजी टिकून आहे. पपईचे वाढलेले भाव मागील काही दिवसांपासून स्थिर आहेत. वाढती उष्णता आणि रमजान सणामुळे पपईला चांगला उठाव आहे. राज्यातील पपई सध्या देशभरात जात आहे. त्यामुळे पपईला सध्या १७०० ते २ हजार रुपयांचा भाव मिळत आहे. यंदा पपईची लागवड सरासरीपेक्षा कमीच होती. त्यामुळे आवकही मर्यादीत आहे. पपईचा बाजारभाव आणखी काही आठवडे कायम राहू शकतो,  असा अंदाज पपई बाजारातील अभ्यासकांनी व्यक्त केला.  

सोयाबीनचे भाव टिकून

सोयाबीनची बाजारातील आवक कमी आहे. मात्र सरकारकडील स्टाॅकचा बाजारावर दबाव आहे. सरकार आपल्याकडील स्टाॅक मार्केटमध्ये कधी आणणार याकडे आता बाजाराचे लक्ष आहे. सरकारकडे जवळपास १९ लाख टन सोयाबीन शिल्लक आहे. तर शेतकऱ्यांकडील सोयाबीनचा स्टाॅक कमी झाला. मात्र तरीही दरावर दबाव आहे. सोयाबीनला आजही बाजारात ४ हजार ते ४ हजार ३०० रुपयांच्या दरम्यान भाव मिळाला. बाजारातील सोयाबीनची आवक यापुढील काळात कमी होत जाईल. त्यामुळे बाजाराची भीस्त सरकारच्या स्टाॅकवरच असेल, असे सोयाबीन बाजारातील अभ्यासकांनी सांगितले.

कापूस दर टिकून

आंतरराष्ट्रीय बाजारात अमेरिकेच्या धोरणामुळे कापसाच्या भावातील मंदी वाढलेली दिसत आहे. देशात मात्र कापसाला चांगला उठाव मिळत आहे. त्यामुळे कापसाचे भाव टिकून आहेत. बाजारातील कापसाची आवकही कमी होत आहे. सध्या ४५ ते ५० हजार गाठींच्या दरम्यान कापसाची आवक होत आहे. यंदा देशातील उत्पादन घटले. त्यामुळे कापसाचा अतिरिक्त पुरवठा होत नाही. याचा आधार बाजाराला मिळत आहे. तर बाजार समित्यांमध्ये कापसाला सध्या ७ हजार ३०० ते ७ हजार ८०० रुपयांच्या दरम्यान भाव मिळत आहे. कापसाचे भाव कायम राहू शकतात, असा अंदाज कापूस बाजारातील अभ्यासकांनी व्यक्त केला.