आज देशातील बाजारात कापूस दरात सुधारणा पाहायला मिळाली. कापूस दरात आज क्विंटलमागं ३०० ते ५०० रुपयांनी दरात वाढ झाली होती. कापसाचे भाव आज बाजार समित्यांमध्ये ६ हजार ७०० ते ७ हजार ५०० रुपयांच्या दरम्यान पोचले होते. तर वायद्यांमध्ये कापूस वाढून ६० हजार ४०० रुपयांवर पोचला होता. देशात यापुढील काळात सणांमुळे कापसाला मागणी वाढेल. त्यामुळे दरातही सुधारणा दिसू शकते, असा अंदाज कापूस बाजारातील अभ्यासकांनी व्यक्त केला.
सोयाबीन बाजारात आज नरमाई दिसली. देशात तसेच आंतरराष्ट्रीय बाजारातही सोयाबीनचे भाव नरमले होते. सोयाबीनचे वायदे आंतरराष्ट्रीय बाजारात आज निचांकी १३.११ डाॅलरवर पोचले होते. तर सोयापेंड ३९१ डाॅलरपर्यंत कमी झाले होते. देशातील बाजारातही सोयाबीन काहीसे नरमले होते. प्रक्रिया प्लांट्सनी दरात ५० रुपयांची कपात केली. तर बाजार समित्यांमध्ये प्रतिक्विंटल सरासरी ४ हजार ५०० ते ४ हजार ९५० रुपये भाव मिळाला. सोयाबीन दरावरील दबाव आणखी काही दिवस दिसू शकतो, असा अंदाज जाणकारांनी व्यक्त केला.
बाजारातील टोमॅटो दरातील तेजी कायम आहे. घाऊक बाजारात टोमॅटोला आजही ७० ते ९० रुपये प्रतिकिलोचा भाव मिळाला. तर किरकोळ विक्री १३० ते १५० रुपयांनी सुरु होती. गुणवत्तेच्या टोमॅटोचे भाव यापेक्षा जास्त होते. चालू महिन्याच्या शेवटी टोमॅटोची आवक काही प्रमाणात वाढण्याचा अंदाज आहे. दरातही नरमाई दिसू शकते. पण टोमॅटोचे भाव ३५ ते ४५ रुपयांच्या दरम्यान राहू शकतात, असा अंदाज अभ्यासकांनी व्यक्त केला.
देशातील घटलेले उत्पादन आणि वाढलेली निर्यात यामुळे हळदीच्या भावात चांगलीच वाढ झाली. जुलैपासून हळदीच्या दरात चांगलीच तेजी आली. एकट्या जुलै महिन्यात हळदीचे भाव जवळपास दुप्पट झाले. बाजार समित्यांमधील भाव आता १२ हजार ते १५ हजार रुपयांच्या दरम्यान भाव मिळत आहे. तर हळदीचे वायदे १५ हजार ते १८ हजार रुपयांच्या दरम्यान आहेत. हळदीचे भाव पुढील ४ ते ५ महिने तरी तेजीतच राहतील, असा अंदाज व्यक्त केला जात आहे.
देशातील बाजारात गेल्या आठवड्यात तुरीच्या दरात चांगली वाढ झाली. देशात तुरीचा पुरवठा कमी आहे. त्यातच आयातदारांनी तुरीची विक्री कमी केल्याचे दिसते. तसेच म्यानमारमधील निर्यातदारांनी माल राखून ठेवल्याची स्थिती दिसली. त्यामुळे गेल्या आठवडाभरात तुरीच्या दरात क्विंटलमागं २०० ते ३०० रुपयांची सुधारणा दिसून आली. तर आफ्रिकेतून आयात होणाऱ्या तुरीच्या दरात क्विंटलमागं ६५० रुपयांची सुधारणा झाली होती. आफ्रिकेतून आयात होणाऱ्या तुरीला प्रतिक्विंटल सरासरी ९ हजार ते १० हजार रुपयांचा भाव मिळाला. महाराष्ट्रातील बाजारातही तुरीची आवक कमी तर मागणी जास्त अशी स्थिती होती. कर्नाटकात गेल्या आठवड्यात स्टाॅकीस्टची मागणी वाढल्याचे व्यापाऱ्यांनी सांगितले होते. परिणामी तूर उत्पादक या दोन्ही राज्यांमध्ये तुरीच्या भावात ३०० रुपयांपर्यंत वाढ झाली.
देशभरातील बाजारात तुरीला ९ हजार ५०० ते १० हजार ५०० रुपयांचा भाव मिळला. तर दुसरीकडे तुरीची लागवड अजूनही गेल्यावर्षीपेक्षा ८ टक्क्यांनी पिछाडीवर आहे. पाऊसमानही कमी राहण्याचा अंदाज आहे. यामुळे तुरीच्या दरातील तेजी कायम राहण्याची शक्यता असल्याचे हवामान विभागाने सांगितले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.