पुणेः देशात कांद्याचा पुरवठा वाढावा आणि कांद्याचे वाढत असलेले भाव कमी व्हावे यासाठी केंद्राने आज (ता.२८) कांद्याचे किमान निर्यातमुल्य वाढवले आहे. आता ३१ डिसेंबरपर्यंत कांद्यावर किमान निर्यातमुल्य ८०० डाॅलर प्रतिटन झाले आहे. किमान निर्यातमुल्य म्हणजे यापेक्षा कमी भावात कांदा निर्यात करता येणार नाही. सरकारने यापुर्वीच कांदा निर्यातीवर ४० टक्के शुल्क लावले आहे. आता किमान निर्यातमुल्यातही वाढ केली आहे.

देशातील बाजारात मागील काही दिवसांपासून कांद्याची टंचाई भासत आहे. कांद्याच्या निर्यातीवर यापुर्वीच केंद्र सरकारने ४० टक्के शुल्क लावले होते. त्यामुळे शेतकऱ्यांमध्ये आधीच रोष होता. सरकारच्या या निर्णयाचा कांदा बाजारावर तब्बल दोन महिने दबाव राहिला. आता मागील दोन आठवड्यांपासून कांद्याची बाजारातील आवक जास्तच कमी झाली. त्यामुळे कांद्याच्या दरात वाढ झाली. कांदा भाव जवळपास दुप्पट झाले. बहुतांशी बाजारात कांद्याचा घाऊक भाव ४ हजार ते ५ हजार रुपयांच्या दरम्यान झाला होता.

पुढील दीड ते दोन महिने बाजारातील कांदा आवक कमीच राहण्याचा अंदाज आहे. कारण कांद्याची उपलब्धता खूपच कमी आहे. यामुळे कांदा भावात आणखी वाढ होण्याची शक्यता आहे. कांद्याच्या भाववाढीवर नियंत्रण ठेवण्यासाठी सरकारने कांदा निर्यात मुल्यात वाढ केली. यापुर्वी कांद्याचे किमान निर्यात मूल्य ४०० डाॅलर होते. ते आता दुप्पट करण्यात आले.

काय निर्णय होऊ शकतो?
केंद्राने यापुर्वीच निर्यातीवर ४० टक्के शुल्क लावले आहे. तर देशात कांद्याची टंचाई आहे. त्यामुळे सध्या होणारी कांदा निर्यात खूपच कमी आहे. सरकारने किमान निर्यात मुल्यात वाढ केली तरी यामुळे देशातील बाजारात फार मोठा पुरवठा वाढेल असे नाही. टंचाई कायम राहणार आहे. यामुळे दर कमी होण्याची शक्यता दिसत नाही. पण सरकारच्या या निर्णयाचा काहिसा मानसिक परिणाम बाजारावर दिसू शकतो, असा अंदाज कांदा बाजारातील अभ्यासकांनी व्यक्त केला.