Maize Market Update जळगाव ः खानदेशात मक्याची आवक (Maize Arrival) कमीच आहे. गारपीट (Hailstorm), पावसाचा परिणाम पिकावर झाला असून, यंदा उत्पादनदेखील (Maize Production) कमी येईल, अशी स्थिती आहे.

मका पिकाची खानदेशात सुमारे ३५ हजार हेक्टरवर लागवड झाली आहे. लागवड मागील वर्षाच्या तुलनेत सुमारे पाच हजार हेक्टरने वाढली. पण ती अपेक्षेपेक्षा कमी आहे.

यामुळे आवक कमी आहे. परंतु पीक आडवे झाल्याने पुढे उत्पादनदेखील कमी येईल, असे दिसत आहे. अनेक शेतकरी मक्याचे एकरी ३० ते ३५ क्विंटल उत्पादन साध्य करतात. तर किमान १८ ते २० क्विंटल एकरी उत्पादन अनेकांच्या हाती येते.

परंतु मका लागवडीसाठी प्रसिद्ध जळगावमधील चोपडा, जळगाव, धुळ्यातील शिरपूर, नंदुरबारमधील शहादा भागांत वादळ व गारपिटीने पिकांची मोठी हानी झाली आहे.

पीक निसवले होते, त्यात दाणेही पक्व होत होते. पण अशातच पीक आडवे झाल्याने त्यात दाणे पक्व होणार नाहीत. कणसे मातीत गेल्याने त्यांची हानी वाढेल. उत्पादन अत्यल्पच येईल.

अनेकांनी आडवे झालेले पीक काढण्यास सुरवात केली आहे. कारण त्यात उत्पादन हाती येणार नाही. दुसरीकडे काही नुकसानग्रस्त शेतकऱ्यांनी दूध उत्पादक, डेअरी फार्मचालकांना हिरवा चारा म्हणून त्याची विक्री केली आहे. क्षेत्र रिकामे करून त्यात पुढे इतर हंगामाचे नियोजन आहे.

मक्याचे १० ते १२ हजार हेक्टरचे नुकसान

खानदेशात एकूण सुमारे ६० हजार हेक्टरवरील पिकांना वादळ, गारपीट व पावसाचा फटका बसला आहे. त्यात मक्याचे सुमारे १० ते १२ हजार हेक्टरवर मोठे नुकसान झाले आहे. त्यात मक्याचे विक्रमी उत्पादन घेणाऱ्या शेतकऱ्यांनाच मोठा फटका बसला आहे. यामुळे उत्पादकतेवर परिणाम होईल.

वीजपुरवठा विस्कळित

वादळात अनेक भागात खांब वाकले आहेत. यामुळे कृषिपंपांचा वीजपुरवठा सुरळीत होण्यास अडचण येत आहे. तसेच जळगाव, चोपडा, रावेर भागांत काही शेतकऱ्यांच्या रोहित्रांचे नुकसान झाले आहे.

त्यांचीही दुरुस्ती वीज कंपनीकडून करणे अपेक्षित आहे. पण यास विलंब लागत असल्याने मका पिकाचे सिंचन रखडले आहे. यातही पिकांची हानी होत असल्याचे शेतकरी सांगत आहेत.