Jalgaon News : खानदेशात पपईची आवक नीचांकी स्थितीत आहे. रमजान महिन्यामुळे पपईस उत्तरेकडे उठाव आहे. परिणामी दरात वाढ झाली आहे. सध्या दर ९ ते १४ रुपये प्रतिकिलो, असा जागेवर मिळत आहे.

पपईची आवक डिसेंबर व जानेवारीत अधिक असते. फेब्रुवारीच्या मध्यापासून आवक कमी होते. मार्चमध्ये आवक निम्मी कमी होते. तर एप्रिलमध्ये आवकेत मोठी घट होते. कारण, स्थानिक किंवा मध्य क्षेत्रातील बाजारांत उष्णतेमुळे पपईस उठाव नसतो.

परंतु यंदा रमजान महिना या काळात आल्याने पपई दरात वाढ झाली. ही दरवाढ ६ मार्चपासून सुरू झाली. डिसेंबर ते फेब्रुवारीच्या मध्यापर्यंत पपईचे दर थेट खरेदीत अडीच ते तीन रुपये प्रतिकिलो होते.

परंतु फेब्रुवारीच्या अखेरीस दरात सुधारणा सुरू झाली. मार्चमध्ये पपईला सरासरी १३ रुपये प्रतिकिलोचा दर जागेवर मिळाला, तर किमान नऊ व कमाल १४ रुपये प्रतिकिलोचा दर मिळाला.

उत्तर भारतात पाठवणूक

पपईची आवकही नीचांकी स्थितीत आहे. आवक जानेवारी व फेब्रुवारीत प्रतिदिन सरासरी ४० ट्रक (एक ट्रक १६ टन क्षमता) एवढी होती. मार्चच्या मध्यात आवक प्रतिदिन सरासरी १५ ट्रक एवढी झाली. सध्या प्रतिदिन १० ट्रक पपईची आवक खानदेशात होत आहे. पपईची पाठवणूक दिल्ली, उत्तर प्रदेश, पंजाब, हरियाना, काश्मीर आदी भागात केली जात आहे.