Pune News: देशातून तेलबिया पेंडेची निर्यात यंदा घटली आहे. चालू आर्थिक वर्षात आतापर्यंत ३६ लाख टन तेलबिया पेंड निर्यात झाली होती. मोहरी आणि एरंडी पेंड निर्यात कमी झाली. तर सोयाबीन पेंड निर्यात घटली आहे. सोयापेंड निर्यात जवळपास १८ लाख टन झाली, असे द साॅल्वेंट एक्सट्राक्टर्स असोसिएशन ऑफ इंडिया अर्थात एसईएने म्हटले आहे. 

एसईएने एप्रिल २०२४ ते जानेवारी २०२५ या १० महिन्यांतील काळात देशातून झालेल्या तेलबिया पेंडेचा अहवाल नुकता प्रसिध्द केला. मोहरी पेंड आणि एरंडी पेंड निर्यात कमी झाल्याने यंदा देशातून होणारी निर्यात जवळपास साडेनऊ टक्क्यांनी घटली आहे. भारतातून या १० महिन्यांमध्ये ३६ लाख टन तेलबिया पेंड निर्यात झाली.

मागील वर्षी याच काळातील निर्यात ३९ लाख टन होती. यंदा मोहरी पेंड निर्यात १५ लाख ४२ हजार टनांवर स्थिरावली आहे. मागील हंगामात याच काळातील निर्यात जवळपास १९ लाख टनांवर पोचली होती. तर एरंडी पेंड निर्यात सव्वातीन लाख टनांवरून कमी होऊन अडीच लाख टनांवर स्थिरावली आहे. 

एसईएचे कार्यकारी संचालक भारत मेहता यांनी सांगितले की, भारताच्या मोहरी पेंडेचा मुख्य ग्राहक बांगलादेश आहे. मात्र भारत-बांगलादेश संबंधामुळे निर्यात मंदावली आहे. मागील काही महिन्यांपासून मोहरी पेंड निर्यातीवर परिणाम झाला आहे. भारताच्या तेलबिया पेंडेला दक्षिण कोरियाची चांगली मागणी राहीली. दक्षिण कोरियाने ६ लाख टन आयात केली. यात ४ लाख टन मोहरीपेंड तर एरंडी पेंड दीड लाख टन आणि सोयापेंडचा ४९ हजार टन समावेश आहे. 

व्हिएतनामला २ लाख टन निर्यात झाली होती. थायलंडने साडेतीन लाख टनांची आयात केली. बांगलादेशला सव्वासहा लाख टन तर इराणला दीड लाख टनांची निर्यात झाली. 

सोयापेंड निर्यात वाढली

भाराताची सोयापेंड निर्यात चालू आर्थिक वर्षातील पहिल्या १० महिन्यांमध्ये जवळपास १८ लाख टन झाली. मागील वर्षी याच काळातील निर्यात १६ लाख टनांवर झाली होती. भारताच्या सोयापेंडला यंदा युरोपातील देशांची चांगली मागणी राहीली. त्यातही जर्मनी आणि फ्रान्सला झालेली निर्यात चांगली आहे.