Jalgaon News : खानदेशात पिलबाग किंवा खोडवा केळी पिकात काढणी सुरू झाली आहे. कुंभ मेळ्यानिमित्त केळीला मागणी असून, दरात क्विंटलमागे किंचित सुधारणा झाली आहे. सध्या कमाल १७०० व किमान १३०० रुपये प्रतिक्विंटलचा दर केळीस आहे.

जुनारी किंवा काढणी ७० ते ८० टक्के पूर्ण झालेल्या केळी बागांमधील केळीचे दर १०००, ८०० ते ७०० रुपये प्रतिक्विंटल, असे आहेत. केळीचे दर मध्यंतरी कमी झाले. कमाल दर १५०० ते १६०० रुपये प्रतिक्विंटल, असे होते. केळी पिकात चिलिंग इंज्युरी किंवा थंडीमुळे काही समस्याही आल्या. निर्यातीवर परिणाम झाला.

केळीची मागणी उत्तरेकडील थंडीमुळे घटली. यामुळे दर सतत कमी झाले. परंतु उत्तर प्रदेशातील प्रयागराज येथील कुंभ मेळ्यानिमित्त केळीस मागणी येत आहे. केळी दरात किंचित सुधारणा मागील तीन ते चार दिवसांत झाली आहे.

केळीची आवक खानदेशात कमीच आहे. कारण कांदेबाग केळीमधील काढणी पूर्ण झाली आहे. सध्या जळगावातील रावेर, यावल, मुक्ताईनगर, चोपडा आदी भागांत केळीची आवक आहे. तसेच धुळ्यातील शिरपूर, नंदुरबारातील शहादा, तळोदा भागांतही पिलबाग केळी पिकातून आवक सुरू आहे. ही आवक कमी आहे. पण पुढील पंधरवड्यात आवकेत किंचित वाढ अपेक्षित आहे.

उत्तर प्रदेशातून मागणीत वाढ

सध्या खानदेशात रोज ४० ते ४५ ट्रक (एक ट्रक १६ टन क्षमता) केळीची आवक होत आहे. आवक नीचांकी स्थितीत आहे. मध्य प्रदेशातील बऱ्हाणपुरातही केळी आवक कमी आहे. उत्तरेकडे केळीची पाठवणूक सुरू आहे. अधिकची मागणी उत्तर प्रदेशातून आल्याची माहिती मिळाली.