Hapus Mango Market मुंबईच्या कृषी उत्पन्न बाजार समितीच्या घाऊक फळबाजारात हापूस आंब्याची आवकेत (Mango Arrival) मोठी वाढ झाली आहे. आवक वाढल्यामुळे हापूसच्या दरात (Hapus Mango Rate) घसरण झाली आहे.

त्यामुळे सध्या हापूसला १५०० ते चार हजार रुपये प्रति डझन असा दर हापूसला मिळत आहे. आवक वाढल्यामुळे हापूसच्या एका पेटीमागे तीन हजारांची घसरण झाली आहे.

दरवर्षी कोकणातून मोठ्या प्रमाणात मुंबईसह राज्याच्या इतर भागात हापूसची आवक होत असते. मार्च महिन्याच्या शेवटच्या आठवड्यापर्यंत ही आवक वाढतच जाते.

सध्या बाजारसमितीमधील आंब्याची विक्रमी आवक सुरू राहण्याची शक्यता आहे. परिणामी हापूसच्या दरात घसरण झाली आहे.

मुंबई एपीएमसीच्या घाऊक फळबाजारात शुक्रवारी (ता. ३१) ७३ हजार २९१ हापूसच्या पेट्यांची आवक झाली आहे. आवकेतील वाढ झाल्यामुळे हापूसचे दर १५०० ते चार हजारांवर आले आहेत.

वाशी बाजारात भाज्यांचे दर घसरले -

एकीकडे मुंबई बाजार समितीत आवक वाढल्यामुळे हापूसचे दर घसरले आहेत, तर दुसरीकडे वाशी कृषी उत्पन्न बाजार समितीच्या घाऊक भाजीपाला बाजारातही भाज्यांची आवक वाढल्यामुळे भाज्यांच्या दरात घट झाली आहे. वाशी बाजारात गुरूवारी (ता. ३०) भाज्यांच्या ६०० गाड्यांची आवक झाली. परंतु कमी उठावामुळे दर गडगडले.

आवक वाढल्यामुळे कारली, फरसबी, काकडी, शिमला आणि हरवी मिरचचे दर प्रतिकिलो १० ते १५ रुपयांनी घसरले. आधीच अवकाळी पाऊस आणि गारपिटीमुळे शेती पिकांचे नुकसान झाल्यामुळे शेतकऱ्यांचे आर्थिक नुकसान झाले आहे. त्यात आता बाजारातही शेतमालाचे दर घसरल्याने शेतकऱ्यांच्या नुकसानात भर पडली आहे.