Satara News: आले लागवडीसाठी आवश्यक असणारे आले बियाणे काढणी व खरेदी अंतिम टप्प्यात आली आहे. आले पिकांच्या दरात मोठी घसरण झाल्याने बियाणे खरेदी कमी होत आहे. सध्या बियाण्यास १४ ते १५ हजार रुपये प्रति गाडी (५०० किलो) दर मिळत आहे.

गेल्या तीन ते चार वर्षांत आले पिकास दराचा समाधानकारक गोडवा मिळाल्याने आले पिकाच्या क्षेत्रात जिल्ह्यात सातशे ते आठशे हेक्टर क्षेत्रात वाढ झाली होती. मात्र मागील वर्षाच्या सप्टेंबरपासून दराला उतरण लागून आले पिकाचे दर गाडीला ५५ हजारांवरून आठ ते साडेनऊ हजारांवर आले असल्याने पुढील काळात दराबाबत साशंकता वाटत असल्याने बियाणे खरेदी करण्याकडे कल कमी झाला आहे.

बियाण्यांचे दर एक ते दोन हजार रुपयांनी कमी झाले असून गाडीस १३ हजार ते १५ हजार रुपये दराने खरेदी केली जात आहेत. मालाच्या प्रतवारीनुसार दरात कमी जास्त होत आहे. दरातील घसरणीमुळे जिल्ह्यातील किमान एक हजार हेक्टर क्षेत्रात घट होण्याचा अंदाज आहे.

पुढील हंगामात अडीच हजार हेक्टरवर लागवडीचा अंदाज आहे. मात्र दर काय राहतील यावरही क्षेत्र कमी जास्त होऊ शकते. धुणीच्या आल्यास आठ ते साडेनऊ हजार रुपये प्रति गाडी याप्रमाणे व्यापाऱ्यांकडून खरेदी होत आहे.

दर कमी होईल या भीतीने आले काढण्याकडे कल आहे, मात्र व्यापाऱ्यांकडून सौदे कमी प्रमाणात होत आहेत. सौदा ठरवल्यानंतर आले काढणी लवकर होत नसल्याने शेतकऱ्यांची नाराजी आहे. जिल्ह्यात तापमान वाढल्याने आले पिकांच्या वजनातही घट होत असून अपेक्षित उत्पादन मिळत नसल्याचे शेतकरी सांगत आहेत.