Jalgaon News : खानदेशात मोठा काबुली (डॉलर किंवा मेक्सिको) व अन्य हरभऱ्याची आवक सतत वाढत आहे. काबुलीच्या दरात मागील पंधरवड्यात क्विंटलमागे तीन ते सव्वातीन हजार रुपयांची घसरण झाली आहे.

२६ फेब्रुवारी ते १ मार्च या कालावधीत खानदेशात गारपीट, वादळी पाऊस झाला. यात हरभऱ्याचे नुकसान झाले. परंतु ही समस्या दूर झाल्यानंतर हरभरा दरात सतत घट झाली आहे. मोठ्या व लहान प्रकारातील काबुली हरभऱ्याचे दर क्विंटलमागे तीन ते सव्वातीन हजार रुपयांनी घसरले आहेत. त्याची आवकही वाढली आहे.

खानदेशात मोठ्या काबुलीची आवक धुळ्यातील शिरपूर, दोंडाईचा (ता. शिंदखेडा), नंदुरबारातील शहादा व नंदुरबार, जळगावातील जळगाव, चोपडा व अमळनेर येथील बाजारांत होत आहे.

लहान व मोठ्या प्रकारातील काबुलीची आवक १५ ते १६ दिवसांपूर्वी खानदेशात प्रतिदिन सरासरी १५०० क्विंटल एवढी होती. परंतु सध्या मोठ्या काबुलीची आवक प्रतिदिन सरासरी दोन हजार क्विंटल आहे. एकट्या चोपडा बाजार समितीत रोज ७८० ते ८०० क्विंटल मोठ्या काबुलीची आवक होत आहे.

मोठ्या काबुलीचे दर फेब्रुवारीच्या मध्यात प्रतिक्विंटल १० ते १३ हजाल रुपये होते. सध्या मोठ्या काबुलीचे दर ९७०० ते १० हजार ६०० आणि सरासरी १० हजार १०० रुपये प्रतिक्विंटल आहेत. चोपडा, जळगाव व शिरपूर येथे दरांमध्ये मोठा बदल होत नसल्याची स्थिती आहे.

लहान प्रकारातील काबुलीची आवक फेब्रुवारीच्या सुरुवातीला सुरू झाली. सुरुवातीला लहान काबुलीचे दर सरासरी १० हजार रुपये प्रतिक्विंटल होते. सध्या त्याचे दरही ७००० रुपये प्रतिक्विंटल आहेत. लहान काबुलीची चोपडा, अमळनेर, शिरपूर येथे मिळून रोज २१०० ते २२०० क्विंटल आवक होत आहे. सर्वाधिक आवक चोपडा येथे होत आहे.

देशी हरभऱ्याची आवकही वाढतीच

देशी प्रकारातील हरभऱ्याची आवकही सतत वाढत आहे. देशी हरभरा दरातही मोठी सुधारणा झाली नाही. त्याचे दरही ५२०० ते ५५०० रुपये प्रतिक्विंटल आहेत. त्याची आवक खानदेशात रोज तीन हजार क्विंटल होत आहे. देशी हरभऱ्याच्या आवकेतही सतत वाढ झाली असून, मागील २५ ते २८ दिवसांत दर ७०० ते ८०० रुपयांनी कमी झाले आहेत.