Pune News: देशात यंदा कापसाचे दर दबावात आहेत. मात्र अमेरिकेत व्यापार युध्दामुळे भाव पडलेले आहेत. भाव कमी असल्याने भारतात अमेरिकेच्या कापसाची आयात तब्ब ६ पटीने वाढली. मागील तीन महिन्यात अमेरिकेतून १ लाख ५५ हजार गाठींची आयात झाली. अमेरिकेत आजही भाव कमीच आहेत. त्यामुळे अमेरिकेच्या कापसाची आयात सुरुच राहील, असे आयातदारांनी सांगितले. 

भारतात यंदा शेतकऱ्यांना कापसाला भाव मिळत आहे. कापसाचे भाव मागील चार वर्षात कमीच झाले आहेत. देशातील बाजारात सध्या कापसाला सरसारी ७ हजार ३०० ते ७ हजार ८०० रुपयांच्या दरम्यान भाव मिळाला. पण बाजारातील शेतकऱ्यांच्या कापसाची आवक खूपच कमी झाली. त्यामुळे कापसाच्या भावात सुधारणा दिसून येत आहे. यंदा बहुतांशी शेतकऱ्यांना हमीभावापेक्षा कमी दरात कापूस विकावा लागला. तरीही आंतरराष्ट्रीय बाजारात कापसाचे भाव आपल्यापेक्षा कमीच आहेत. 

अमेरिकेचे राष्ट्राध्यक्ष डोनाल्ड ट्रम्प यांनी व्यापार युध्द सुरु केले. त्यामुळे अमेरिकेत कापसाचे भाव आणखी कमी झाले. अमेरिकेचा कापूस स्वस्त असल्याने भारतासह आशियातील देशांनी अमेरिकेच्या कापसाची आयात वाढवली. भारतातही मागील ३ महिन्यांमध्ये अमेरिकेतून आयात होणाऱ्या कापसाचे प्रमाणा वाढले आहे. फेब्रुवारी ते एप्रिल दरम्यान अमेरिकेच्या कापसाची आय़ात ६ पटीने वाढली. या तीन महिन्यात भारताने १ लाख ५५ हजार गाठी (एक गाठ १६० किलो) कापसाची आयात केली. गेल्या वर्षी याच तीन महिन्यांमध्ये अमेरिकेतून भारतात केवळ २५ हजार गाठींच्या दरम्यान कापसाची आयात झाली होती. 

अमेरिका चीनच्या तणामुळे भाव कमी

अमेरिका आणि चीन यांच्यामध्ये व्यापार युध्दामुळे तणाव निर्माण झाला. अमेरिकेने चीनमधून आयात होणाऱ्या वस्तुंवर आयात शुल्क वाढवले. ५४ टक्क्यांपासून वाढ करत काही वस्तुंवर ही वाढ २४५ टक्क्यांपर्यंत केली. चीननेही अमेरिकेच्या आयात शुल्क वाढीला उत्तर देत अमेरिकेतून आयात होणाऱ्या वस्तुंवर शुल्क वाढवले. त्यामुळे अमेरिकेतून कापसाची होणाऱ्या निर्यातीवरही परिणाम झाला होता. परिणामी भावावर दबाव वाढला. त्यात भारतात बाजारातील आवक कमी झाल्यामुळे दरात सुधारणा झाली. त्यामुळे अमेरिकेचा कापूस आणखी स्वस्त झाला. परिणामी अमेरिकेतून कापसाची आयात वाढत आहे.