Nagar News : पावसाळा सुरू झाल्यानंतर अनेक भागांत दमदार पाऊस झाला. मात्र, हिरवा चारा उपलब्ध व्हायला अजून किमान वीस ते पंचवीस दिवसांचा कालावधी जाणार असल्याने नगर येथील दादा पाटील शेळके कृषी उत्पन्न बाजार समितीत मका, कडवळ, घास, उसाची आवक कायम आहे. शेतकरी, पशुपालकांकडून मागणीही कायम असल्याचे बाजार समितीतून सांगण्यात आले.

विशेष म्हणजे पावसाळा सुरू झाला तरी उन्हाळ्यात असलेले हिरव्या चाऱ्याचे दर कमी झालेले नाहीत. सध्या बाजार समितीत ऊस, मका, कडवळ या हिरव्या चाऱ्याला टनाला तीन हजार रुपये मोजावे लागत आहेत, तर घास तीन हजार रुपये प्रति हजार पेंढी दराने विकला जात आहे.

साधारण पाच ते सात टनांपर्यंत दररोज हिरव्या चाऱ्याची येथे विक्री होत आहे. जिल्ह्यात पशुपालनाला शेतकरी प्राधान्य देत आहेत. त्यामुळे हिरव्या चाऱ्याला अधिक मागणी असते. आठ दिवसांपासून जिल्ह्यातील अनेक भागांत दमदार पावसाने हजेरी लावलेली आहे. मात्र, अद्यापही जनावरांच्या चाऱ्याचा प्रश्न कायम आहे.

मृगाच्या पावसाने बळीराजा सुखावला आहे. मात्र, जनावरांच्या चाऱ्याचा प्रश्‍न अजून कायम आहे. पावसाने अशीच साथ दिली, तर पुढील महिनाभरात हिरवा चाऱ्याचा प्रश्न सुटेल, असे शेतकऱ्यांमधून बोलले जात आहे. सध्या मात्र हिरव्या चाऱ्याला उन्हाळ्यातील दराप्रमाणेच पैसे मोजावे लागत आहेत.

रोहिणीबरोबरच मृग नक्षत्र चांगला बरसल्याने शेतकरी बांधवांनी मका, कडवळ, घास, मूर घास, बिन्नी गवताची लागवड सुरू केली आहे. या चाऱ्याला किमान एक ते दीड महिन्याने जनावरांना वापरता येणार असल्याने सध्यातरी शेतकरी बांधवांना तीन हजारांच्या दरातच हिरवा चारा खरेदी करावा लागणार आहे. वैरणीचे भावही वाढलेले आहेत.