Latur News : शेतीमाल हमीभाव खरेदी केंद्र सुरू करण्यापूर्वी केंद्राची माहिती शेतकऱ्यांना होण्यासाठी प्रचार व प्रसार करावा, असा आग्रह माजीमंत्री अमित देशमुख यांनी पणनमंत्री जयकुमार रावल यांच्याकडे धरला. मुंबई मंत्रालयात आयोजित बैठकीत देशमुख यांनी कापूस व इतर शेतीमाल उत्पादकता वाढवण्यासाठी शासनाने बाजार समितीमार्फत मार्गदर्शक यंत्रणा उभारावी, अशी मागणीही केली.

शेतकऱ्यांनी उत्पादित केलेल्या कापसाची सीसीआय मार्फत व्यवस्थित खरेदी होत नसल्याच्या संदर्भाने अर्थसंकल्पी अधिवेशनात आमदार देशमुख व आमदारांनी प्रश्न उपस्थित केले होते. त्यावर रावल यांनी आमदारांसोबत बैठक घेऊन चर्चा केली.

काही तांत्रिक कारणामुळे नऊ फेब्रुवारी रोजी कॉटन कॉर्पोरेशन ऑफ इंडियाच्या वतीने सुरू असलेल्या काही कापूस खरेदी केंद्रावर खरेदी प्रक्रिया विस्कळित झाली होती मात्र त्यानंतर १२४ खरेदी केंद्रावर कापूस खरेदीची प्रक्रिया नियमित सुरू राहिली, अशी माहिती बैठकीत देण्यात आली.

शेतकऱ्यांनी उत्पादित केलेला कापूस त्यांनी कमी किमतीत विक्री करू नये यासाठी कापूस खरेदी केंद्र, कधी ? आणि कुठे ? सुरू होणार आहेत याची शासनाने व्यापक प्रमाणात प्रसिद्ध करावी. शेतकऱ्यांना कापूस उत्पादनातून फायदा मिळावा यासाठी निर्यातक्षम कापसाची लागवड करण्यासाठीही शासन आणि बाजार समिती मार्फत मार्गदर्शन करावे,

कापूस व इतर शेतीमालाचे उत्पादन वाढवण्यासाठी, योग्य पद्धतीचे मार्गदर्शन करणारी यंत्रणाच शासन व बाजार समितीच्या वतीने उभारण्यात यावी, शेतीमालाच्या हमीभाव खरेदी केंद्रांना मंजुरी देताना त्यात होणारा गोंधळ संपुष्टात आणावा आदि सूचना आमदार देशमुख यांनी केल्या. रावल यांनी या सर्व सूचनांचे स्वागत करून त्या संबंधाने योग्य कारवाई करण्यात येईल, अशी ग्वाही या प्रसंगी दिली.