अकोट, जि. अकोला : येथील कृषी उत्पन्न बाजार समितीत (Akot APMC) कापूस खरेदी (Cotton Procurement) पूर्ववत झाल्यानंतर हळूहळू शेतकरी कापूस विकायला आणत आहेत. येथे कापूस ८३०० ते ८८०० रुपये प्रतिक्विंटलने विकत आहे. गुरुवारी (ता. १५) सुमारे ५५० क्विंटल कापसाची विक्रीसाठी आवक झाली.

बाजार समितीत विक्रीला आलेल्या हलक्या कापसाची सौदापट्टीवर नोंद करण्याच्या कारणामुळे व्यापारी व प्रशासनात वाद निर्माण झाला. ६ डिसेंबरपासून खरेदी थांबली होती. अखेरीस जिल्हा उपनिबंधकांनी मध्यस्थी करून वाद मिटविला. त्यानंतर गुरुवारपासून खरेदी सुरू झाली.

नऊ दिवस बाजार बंद असल्याने आवक थांबली होती. आता बाजार उघडताच हळूहळू आवक सुरू झाली. कापूस खरेदी सुरू करण्यात आली असून, कास्तकारांना मोठा दिलासा मिळाला आहे. कापसाची बाजारपेठ पुन्हा गजबजू लागली आहे. गुरुवारी संध्याकाळपर्यंत एकूण ३१ वाहनातून अंदाजे ५५० क्विंटल कापूस खरेदी करण्यात आला.

आता बाजारात प्रामुख्याने कोरडवाहू पट्ट्यातील कापूस विक्रीला येणार आहे. सध्या या पट्ट्यातील कापूस वेचणी जोमाने सुरू झालेली नाही. जानेवारीत हा कापूस मोठ्या प्रमाणात यायला सुरुवात होते. त्या काळात बाजारात कापसाची आवक वाढेल, असे बाजार समितीकडून सांगण्यात आले.