Jalgaon News : खानदेशात कापूस दरात सुधारणा फारशी झाली नाही. परंतु आता कापूस आवक कमी होत आहे. खेडा खरेदीला प्रतिसाद कमी मिळत असून, शेतकऱ्यांकडील कापूससाठा ७० ते ७५ टक्के घटल्याची स्थिती आहे.

शासकीय कापूस खरेदीही बऱ्यापैकी झाली आहे. या केंद्रांत कापूस विक्रीसंबंधी शेतकऱ्यांचा प्रतिसाद मिळाला आहे. पण खेडा खरेदीत दर उत्पादन कमी असून, यंदा कमीच आहे. कापसाचे उत्पादन अल्प आहे. कोरडवाहू कापूस एकरी ५० किलोच आला आहे. पूर्वहंगामी कापूस काही शेतकऱ्यांना तीन ते चार, तर काहींना दोन क्विंटल एवढाच हाती आला आहे.

परिणामी, कापसाचा साठाच शेतकऱ्यांकडे कमी आहे. यात खर्च मात्र वाढला आहे. खते, मशागत, मजुरी यावरील खर्च वाढला आहे. यामुळे कापसाला चांगला दर मिळावा, अशी अपेक्षा शेतकऱ्यांची होती. पण दरवाढ मकर संक्रांतीनंतरही न झाल्याने अनेकांनी कापूस विक्रीची गती वाढविली. सध्या खानदेशात खेडा खरेदीत कापसाला ६२०० ते ६६०० रुपये प्रतिक्विंटलचा दर आहे.

खानदेशात कापसाची बाजार समित्यांत आवक होत नाही. खेडा खरेदी किंवा थेट गावांत जावून खरेदी केली जाते. कापसाची आवक सध्या मागील पंधरवड्याच्या तुलनेत कमी झाली असून, प्रतिदिन २४ ते २५ हजार क्विंटल कापसाची आवक होत आहे. या महिन्याच्या मध्यात किंवा जानेवारीच्या सुरुवातीला प्रतिदिन सरासरी २९ ते ३० हजार क्विंटल कापसाची आवक होती.

हमीभाव नसल्याने आर्थिक नुकसान

आवकेत मागील काही दिवसांत काहीशी घट झाली आहे. परंतु हमीभाव नसल्याने व कापूस दरांत सुधारणा न झाल्याने शेतकऱ्यांचे आर्थिक नुकसान होतच आहे. अल्प शेतकऱ्यांनी सध्या कापसाची विक्री करणे टाळले आहे. कारण दरवाढ होईल, अशी अपेक्षा शेतकऱ्यांना अजूनही आहे.