Jalgaon News: खानदेशात केळी आवकेत मागील सात ते आठ दिवसांत सतत घट झाली आहे. परंतु केळी दर अस्थिर असून, किमान ९००, कमाल १९०० तर सरासरी १४०० रुपये प्रति क्विंटलचा दर आहे.

आठ ते १० दिवसांपूर्वी खानदेशात थेट खरेदीत केळीचे कमाल दर २१०० ते २२०० रुपये व किमान दर ११०० रुपयांवर होते. सरासरी दरपातळी १७०० रुपयांपर्यंत होती. केळी आवकेतही मागील काही दिवसांत सतत घट झाली आहे. खानदेशात सध्या १८० ते १८५ ट्रक (एक ट्रक १६ टन क्षमता) केळीची आवक होत आहे.

रावेर, यावल, मुक्ताईनगर या केळी पट्ट्यातही आवकेत सतत घट झाली आहे. धुळ्यातील शिरपूर तालुक्यातील केळी आवकही कमी झाली आहे. परंतु केळी दर मात्र वधारलेले नाहीत. त्यात घट झाली आहे.

उत्तरेकडे केळीची मागणी घटली आहे. तसेच उत्तरेकडे अन्य भागातूनही केळी पाठविली जात आहे. यामुळे खानदेशातील केळीसमोर स्पर्धा असून, केळी दरांवर त्याचा परिणाम झाल्याची माहिती आहे. दर्जेदार केळी खानदेशात काढणीवर आहे.

मध्य प्रदेशातील बऱ्हाणपूरच्या बाजारातही केळी आवकेत घट झाली आहे. पण तेथील बाजारात लिलावामध्ये केळीला कमी दर मिळाल्याची माहिती आहे. तेथे केळीचे कमाल किंवा उच्चांकी दर १९०० रुपयांवर आहेत. तर किमान दर ९०० रुपये प्रतिक्विंटल, असे आहेत. तेथे सध्या प्रतिदिन ८० ते ८५ ट्रक (एक ट्रक १० ते १६ टन क्षमता) केळीची आवक होत आहे. पुढे खानदेशात केळी आवकेत आणखी घट होईल, असे दिसत आहे.