Nagpur News: भारतीय कापूस महामंडळाकडून (सीसीआय) देशभरात एकूण आवकेपैकी ४६ टक्‍के कापसाची खरेदी करण्यात आल्याचे वृत्त आहे. त्यानुसार मोठ्या प्रमाणावर ‘सीसीआय’कडे कापसाची उपलब्धता असल्याने यंदाच्या हंगामात प्रक्रिया उद्योगासाठी लागणाऱ्या कच्च्या मालाच्या उपलब्धतेसाठी बाजाराची अवलंबिता पूर्णपणे सीसीआयवर राहणार असल्याचा दावा या पार्श्‍वभूमीवर केला जात आहे.

सीसीआयच्या केंद्रावर कापसाची आवक वाढती असल्याचे चित्र यंदाच्या हंगामात अनुभवण्यात आले. केंद्र सरकारने कापसासाठी २०२४-२५ या वर्षासाठी लांब धाग्याच्या कापसासाठी ७५२१ रुपये प्रति क्‍विंटलचा दर जाहीर केला होता. हंगामाच्या सुरुवातीला असलेल्या कापसाची स्टेपल लेंथ (......... ) २७.५ ते ३२ एमएम राहते.

या दर्जाच्या कापसाची हमीभावाने खरेदी करण्यावर सीसीआयचा भर होता. त्यानंतर जानेवारीपासून दुसऱ्या, तिसऱ्या वेच्यातील कापसाची स्टेपल लेंथ कमी होत जाते. त्यासोबतच त्यात कचऱ्याचे प्रमाणही वाढत राहते. त्यामुळे अशा कापसाला स्टेपल लेंथच्या प्रमाणानुसार प्रति क्‍विंटल १०० रुपये कमी दर दिला जातो. सध्या एच-४ मोडमधील कापसाची खरेदी केली जात असून, या दर्जाच्या कापसाला सीसीआयकडून ७४११ रुपयांचा दर दिला जात आहे.

खासगीत व्यापाऱ्यांकडून ७१५० रुपये क्‍विंटल दराने कापसाची खरेदी होत आहे. हिंगणघाट (वर्धा) बाजार समितीचा विचार करता या ठिकाणी कापसाची आवक ४८५ गाड्यांची होत आहे. यातील व्यापाऱ्यांद्वारे खरेदी होणाऱ्या कापसाला सद्यःस्थितीत ७१०० ते ७३३५ रुपये क्‍विंटलचा दर मिळत आहे. सीसीआयकडून या ठिकाणी कापसाला ७१२४ ते ७४२१ रुपये असा दर मिळत आहे.

अमरावती बाजार समितीअंतर्गंत होणाऱ्या सीसीआय खरेदीचा दर हिंगणघाट बाजार समितीमधील दरानुसार होता. अमरावती बाजार समिती अंतर्गत खासगी व्यापाऱ्यांकडून मात्र काहीसा सुधारित दर कापसाला देण्यात आला. या ठिकाणी व्यापाऱ्यांनी कापसाची खरेदी ७२०० ते ७५२५ रुपयांनी केली. विदर्भातील इतर बाजार समित्यांच्या तुलनेत या ठिकाणी चांगला दर मिळाला, असे सांगितले जाते.