Sindhudurg News: सिंधुदुर्ग जिल्ह्यात परिपक्व काजू बीला प्रतिकिलो १७० ते १८० रुपये दर मिळत असून ओल्या काजू बीला प्रतिकिलो १३० रुपये दर मिळत आहे. काजू बीच्या उत्पादनात अजूनही अपेक्षित वाढ झालेली नाही. त्यामुळे काजू बीचे दर आणखी वाढण्याची शक्यता आहे.

फेब्रुवारी महिन्याची १८ तारीख उजाडली असली तरी अजूनही काजू बीचे अपेक्षित उत्पादन येत नसल्याचे चित्र जिल्ह्यातील सर्व बाजारपेठांमध्ये आहे. दोडामार्ग, बांदा परिसरात काही प्रमाणात काजू बीची आवक सुरू आहे. कीड, रोग आणि वाढलेल्या तापमानामुळे आलेल्या मोहोरांचे फळधारणेत रूपांतर झालेले नाही.

त्यामुळे उत्पादन घटण्याची शक्यता आहे. सध्या बांदा, सावंतवाडी आणि दोडामार्ग या परिसरात किरकोळ स्वरूपात काजू बी बाजारपेठेत येत आहे. या काजू बीला चांगला दर मिळत आहे. दोडामार्ग तालुक्यात प्रतिकिलो १६५ ते १७० रुपये, बांदा बाजारपेठेत १७० ते १८० रुपये असा दर काजू उत्पादकांना मिळत आहे. या दरात आणखी सुधारणा होण्याची शक्यता आहे.

दरम्यान, ओल्या काजू बीची सर्व जिल्ह्यांत खरेदी विक्री सुरू आहे. ओल्या काजू बीला प्रतिकिलो १३० रुपये इतका दर मिळत आहे. तर ओल्या काजूगराला प्रतिकिलो १ हजार ४०० रुपयांपर्यंत दर मिळत आहे. ओली काजू बी शेकडा २५० ते ३५० रुपये दर ओला काजूगर शेकडा ३०० ते ४०० रुपयांनी विक्री केला जात आहे. मुंबई, पुणे, कोल्हापूर आदी शहरांतून ओल्या काजूगरांना मोठी मागणी आहे.