Jalgaon News: खानदेशात केळीची आवक वाढत आहे पण दर १८०० ते २१०० रुपये प्रतिक्विंटवर स्थिर आहेत. सध्या प्रतिदिन ३४ ते ४५ ट्रक (एक ट्रक १६ टन क्षमता) केळीची आवक होत आहे. आवक कमी असल्याने केळी दर स्थिर आहेत.

केळी निर्यात सध्या रखडत सुरू आहे. सध्या आगाप लागवडीच्या मृग बहर बागांतून केळीची आवक अल्प आहे. पण पिलबाग केळीमधून आवक सुरू आहे. या केळीचे दर कमी आहेत. या केळीस १३०० ते १५०० रुपये प्रतिक्विंटलचा दर खरेदीदार देत आहेत. कांदेबाग केळीत काढणी आटोपली आहे.

जळगाव जिल्ह्यातील रावेर, यावल, मुक्ताईनगर, जामनेर, धुळ्यातील शिरपूर, नंदुरबारमधील शहादा, तळोदा व अक्कलकुवा भागात केळीची आवक आहे. पण ही आवक कमी आहे. पुढील आठवड्यात आवकेत वाढ होईल, असे संकेत आहेत. तापमानात वाढ होत आहे. यामुळे केळी पक्व होण्याची गती वाढून केळीची आवक वाढेल, असे संकेत आहेत.

निर्यातही सुरू

दर्जेदार किंवा निर्यातीच्या केळीचे दर २२०० रुपये प्रतिक्विंटल असे आहेत. काही शेतकऱ्यांच्या केळीची जामनेर, जळगाव भागातून निर्यातही झाली आहे. परंतु निर्यात कमी आहे. निर्यातक्षम केळी थंडीमुळे सध्या कमी उपलब्ध आहे. परंतु पुढे निर्यातक्षम केळी उपलब्ध होईल. या केळीचे दर काश्मीरमध्ये पाठवणुकीच्या केळीएवढे असल्याने अनेक जण निर्यातीसंबंधी केळी देत नसल्याची स्थिती खानदेशात आहे.

बऱ्हाणपुरातील आवकही कमी

मध्य प्रदेशातील बऱ्हाणपूर येथेही केळीची आवक कमी आहे. तेथे जळगाव जिल्ह्यातील मुक्ताईनगर, रावेर भागांतूनही केळीची पाठवणूक केली जाते. परंतु सध्या रावेर, मुक्ताईनगर भागात केळीची आवक कमी असल्याने तेथील केळी बऱ्हाणपुरात फारशी जात नसल्याची स्थिती आहे. मध्य प्रदेशातील बऱ्हाणपूर, बडवानी भागांतही केळीची आवक कमी असून, तेथे रोज ३० ते ३२ ट्रक केळीची आवक होत आहे. तेथेही कमाल दर २२०० ते २३०० रुपये प्रतिक्विंटल, असे आहेत.