Akola News : स्थानिक भागातील केळीला सध्या सरासरी १६०० रुपयांचा दर मिळत आहे. दुय्यम दर्जाची केळी ७०० रुपयांना विकली जात असल्याचे शेतकरी सांगत आहेत. यंदा मागील काही दिवसांपासून केळीला चांगला दर मिळतो आहे. अकोल्यातही काही दिवस केळीची प्रतिक्विंटल १८०० रुपयांपर्यंत विक्री झाली. नंतर हा दर दोनशे रुपयांनी कमी होऊन आता १६०० पर्यंत स्थिरावला आहे.

केळीला मागील काही महिने सातत्याने चांगला दर मिळत आला आहे. उपवासाच्या काळात केळीचा दर सुधारल्यापासून तो कमी झालेला नाही. जिल्ह्यात तेल्हारा, अकोट, बार्शीटाकळी या तालुक्यांमध्ये केळीचे क्षेत्र मोठे आहे. त्यातही अकोट, तेल्हारा केळी उत्पादनात अग्रेसर बनलेले आहेत. अकोटमधील पणज हा भाग केळीचे हब बनलेला आहे. जिल्ह्यात पांढरी बोर्डाच्या दरानुसार व्यवहार होत असतात. सध्या हे बोर्ड १६०० पर्यंत विकत असल्याचे सांगितले जाते.

जिल्ह्यात यंदा तेल्हारा तालुक्यात केळी बागांना जूनमध्ये सुरुवातीलाच वादळाचा तडाखा बसला होता. काही बागांमधील झाडे घडांसह तुटून पडली होती. त्याचा फटका मालाला बसला. काही शेतकऱ्यांना मोठे नुकसान सोसावे लागले. वादळाच्या तडाख्यातून वाचलेले केळीचे प्लॉट काढणीवर आहेत. केळीची काढणी सुरू असून केळी कमाल १६०० रुपयांपर्यंत विकत आहे. केळीचे हे दर आणखी काही दिवस टिकून राहण्याची अपेक्षा शेतकऱ्यांना आहे.

किरकोळ विक्री दर किमान ५० ते ६० रुपये डझन

केळीची विक्री १६०० रुपये प्रतिक्विंटल दराने होत असतानाच किरकोळ विक्री दरात मोठी तफावत आहे. केळीची किमान ५० ते ६० रुपये डझन दराने अकोल्यात सर्रास विक्री केली जात आहे. आकाराने मोठे असलेल्या केळीला ६० किंवा त्यापेक्षाही अधिक दर एका डझनासाठी सांगितला जातो.