Sangli News : सांगली, तासगाव बाजार समितीत यंदाच्या हंगामातील नव्या बेदाण्याची सुमारे १६० टन आवक झाली. बेदाण्यास दर्जानुसार ११० ते २१० रुपये प्रतिकिलो दर मिळाला. मात्र, दर्जेदार बेदाणा फेब्रुवारीच्या पहिल्या आठवड्यात विक्रीसाठी येण्याची शक्यता बेदाणा उद्योगातील जाणकरांनी व्यक्त केली.

जिल्ह्यातील कवठेमहांकाळ तालुक्यातील नागज परिसरात जानेवारीच्या पहिल्या आठवड्यापासून बेदाण्यास प्रारंभ झाला. परंतु द्राक्षाची विक्री करून शिल्लक राहिलेल्या द्राक्षापासून बेदाणा तयार केला जात आहे. त्यामुळे बेदाण्याचा दर्जा कमीअधिक आहे.

सांगली बाजार समितीत ५० टन बेदाण्याची आवक झाली. सांगली बाजार समितीत १८ दुकानांत बेदाण्यांचे सौदे काढण्यात आले. हिरव्या बेदाण्याला प्रतिकिलो १६१ रुपये, पिवळ्या बेदाण्यास १३१ रुपये कर काळ्या बेदाण्यास ५० रुपये असा दर मिळाला.

तर तासगाव बाजार समितीत ११० टन बेदाण्याची आवक झाली असून २५ दुकानांत बेदाण्यांचे सौदे काढले. बेदाण्याला ९० पासून २१० रुपयांपर्यंत दर मिळाला. बेदाणा निर्मितीची लगबग सुरू झाली आहे.

फेब्रुवारीच्या दुसऱ्या आठवड्यात दर्जेदार बेदाणा विक्रीसाठी बाजारपेठेत दाखल होईल. त्यानंतर बेदाण्याच्या दरात काहीशी सुधारणा होण्याची शक्यता बेदाणा व्यापाऱ्यांनी वर्तवली आहे.