कोल्हापूर : ‘‘येणाऱ्या साखर वर्षात आंग्रे बंदरातून वाहतूकदार, साखर कारखाने आणि सरकारी संस्था यांच्या सहकार्याने १० लाख टन साखरेची निर्यात करण्याचे उद्दिष्ट आहे,’’ अशी माहिती बंदराचे कार्यकारी संचालक कॅप्टन संदीप गुप्ता यांनी दिली.

जयगड येथील आंग्रे बंदरातर्फे कोल्हापुरातील वाहतूकदार, साखर व्यापाऱ्यांसाठी आयोजित स्नेह मेळाव्यात ते बोलत होते. चौगुले ग्लोबल ग्रुपचे व्यवस्थापकीय संचालक राजीव सावंगीकर यांची प्रमुख उपस्थिती होती.

गुप्ता म्हणाले, ‘‘अनेक अडचणींशी सामना करत गेल्या वर्षी आठ लाख टन साखरेची निर्यात यशस्वी केली. यंदाही साखरेचे उत्पादन (sugar Production) जादा होईल. त्यामुळे जादा साखर निर्यात (Sugar Export) अपेक्षित आहे. सर्वांच्या सहकार्याने आम्ही हे उद्दिष्ट साध्य करणार आहोत.’’

बंदर व्यवस्थापनाचे कोल्हापूर येथील प्रतिनिधी आणि आंग्रे पोर्ट बिझनेस डेव्हलपमेंटचे सहायक महाव्यवस्थापक विशाल दिघे यांनी बंदर सुविधा आणि भविष्यातील विकास योजनांची माहिती दिली. प्रमोदकुमार मुदुली, प्रमोद गौतम आदींनी सर्व वाहतूकदार, उपकरणे, पुरवठादार विक्रेते आणि साखर व्यापाऱ्यांचे स्वागत केले.