जळगाव : लग्नसराई, बारसे यासारखे मुहूर्त साधून होणारे कार्यक्रम आगामी काळात नसल्याने सोने, चांदी (Gold Market) बाजारात सध्या शांतता आहे. गेल्या वीस दिवसांत चांदी व सोन्याच्या दरात (Gold Rate) एक हजार रुपयांची घसरण झाली आहे. सोन्यात गुंतवणूक (Investment In Gold) करणारे मात्र अजून दर कमी होण्याची वाट पाहत आहेत.

फेब्रुवारी महिन्यात रशिया व युक्रेनमधील युद्धामुळे सोने, चांदीच्या दरात सातत्याने ८ मार्चपर्यंत वाढ होत गेली. नंतर मात्र युद्धात शिथिलता येताच सोने, चांदीच्या दरात घसरण सुरू झाली आहे. मार्च महिन्यात सोन्याच्या दरात दोन हजार ७०० रुपयांची, तर चांदीच्या दरात दोन हजारांची घसरण झाली होती. युद्ध सुरू झाल्यापासून सोन्याच्या दरात तीन ते चार हजारांची वाढ झाली होती. चांदीच्या दरात नऊ हजारांची वाढ झाली होती. याचा फायदा अनेक गुंतवणुकदारांनी घेतला.

अक्षयतृतीयेच्या मुहूर्ताअगोदर चांदीचा दर ६९ हजारांवर (प्रतिकिलो) गेला होता. मात्र, नंतर थेट चार हजारांची घसरण होऊन चांदीचा दर ६५ हजारांपर्यंत होता, तर सोन्याच्या दरात एका तोळ्यामागे ३५० रुपयांची घसरण झाली होती. १४ मेस सोन्याचा दर ५० हजार ६०० प्रतितोळा होता. चांदी ६१ हजारांवर होती.

२३ मेस सोन्याचा दरात ९०० रुपयांची वाढ होऊन ५१ हजार ५०० वर गेले, तर चांदीच्या दरात तीन हजारांची वाढ होऊन ६४ हजारांवर गेले. तीस मेस सोने ५१ हजार ७०० रुपये, तर चांदी ६३ हजारांवर गेली. ११ जूनला सोने ५२ हजार, तर चांदी ६३ हजार ५०० रुपये होते. बुधवारी (ता. २२) सोन्याचे दर ५१ हजार रुपये, तर चांदीचा दर ६२ हजार ५०० रुपये होता.

सोने, चांदीचे दर (जीएसटीविना) तारीख-- सोने (प्रतितोळे)--चांदी (प्रतिकिलो)

-१४ मे : ५० हजार ६००--६१ हजार

-२३ मे : ५१ हजार ५००--६४ हजार

-३० मे : ५१ हजार ७००--६३ हजार

-१ जून : ५१ हजार-- ६२ हजार ५००

- ४ जून ः ५१ हजार ३००--६४ हजार

- ७ जून ः ५१ हजार १००--६३ हजार

- ११ जून ः ५२ हजार --६३ हजार ५००

- १४ जून ः ५० हजार ९००--६२ हजार

- १६ जून ः ५१ हजार २००--६४ हजार

- २१ जून ः ५१ हजार ३००--६३ हजार ५००

- २२ जून ः ५१ हजार--६२ हजार ५००