अपेडाने ५० शेतमालांसाठी मॅट्रीक्स विकसित केले आहेत. तसेच त्यांच्या शाश्वत निर्यातीसाठी मार्केट इंटेलिजन्स सेलची स्थापनाही केली आहे. किमान ५० देशांची बाजारपेठ या कृषी उत्पादनांना मिळवून देण्याची अपेडाचा प्रयत्न आहे.

या संदर्भात अपेडाचे अध्यक्ष एम. अंगमुथू म्हणाले, ``आम्ही ५० कृषी उत्पादनांसाठी उत्पादन मॅट्रीक्स तयार केले आहेत. त्यांच्या विस्तारासाठी चांगला वाव आहे. किमान ५० देशांमध्ये या उत्पादनांच्या शाश्वत निर्यातीसाठी एजन्सी काम करणार आहे. त्यानंतर त्याचा आणखी विस्तारही केला जाऊ शकतो.``

अपेडाने निवडलेल्या उत्पादनांमध्ये हापूस, शेवगा आणि ताजे आले या सारख्या विशिष्ट गुणधर्म असलेल्या पिकांचा समावेश आहे. या शेतमालाला किती मागणी राहू शकते, याचा अंदाज घेऊन गेल्या वर्षभरात निर्यातीसाठी योग्य अशी ठिकाणे शोधण्यात आली. अपेडाचा मार्केट इंटेलिन्स सेल शेतमालाच्या सोर्सिंगपासून आंतरराष्ट्रीय बाजारपेठेत विक्री करण्यापर्यंतच्या सर्व समस्या हाताळणार आहे. कमीतकमी ५० देशांत बाजारपेठ उपलब्ध झाली तर शेतकरीही दर्जेदार उत्पादन घेण्यासाठी प्रयत्न करतील, असे अंगमुथू म्हणाले.

याशिवाय अपेडा शेतीमालाच्या जलद वाहतुकीसाठी रेल्वे आणि रस्ते वाहतूक मंत्रालयांसोबत संयुक्तपणे काम करत आहे. विशेषत: नाशवंत माल जलद गतीने निर्यातस्थळी पाठवणे आवश्यक असते.