Chana Market Update Akola : शासनाकडून हमीभावाने (MSP) हरभरा खरेदी (Chana Procurement) केली जात असून खुल्या बाजारातही हरभऱ्याच्या दरात (Chana Rate) थोडीफार सुधारणा दिसून येत आहे.

अकोला बाजार समितीत सोमवारी (ता. ३) हरभऱ्याचा कमाल दर ५०६५ रुपये होता. सरासरी ४७०० रुपये प्रतिक्विंटल दराने हरभरा विक्री झाला.

गेल्या काही दिवसांपासून रब्बीतील नवीन हरभऱ्याची बाजारात आवक वाढलेली आहे. तर दुसरीकडे खुल्या बाजारांमध्ये हरभरा अवघा चार ते साडेचार हजारांदरम्यान विक्री झाला.

शासकीय हमीभाव खरेदी सुरू झाल्यानंतर मात्र थोडाफार दर सुधारला. आता चांगल्या दर्जाचा हरभरा ५००० रुपयांपर्यंत विकला जात आहे. हरभऱ्याचा किमान दर आजही ४००० रुपयांपासून मिळत आहे.

सोमवारी किमान ४०५० ते कमाल ५०६५ रुपयांदरम्यान हरभऱ्याची विक्री झाली. सुमारे १९३१ क्विंटल हरभऱ्याची आवक झाली होती. शासकीय हमीभाव केंद्रावर सध्या हरभरा विक्रीसाठी शेतकऱ्यांची लगबग वाढली आहे.

मात्र, दुसरीकडे बाजार समित्यांमध्येही आवकेवर फारसा परिणाम झाल्याचे दिसून येत नाही. बहुसंख्य शेतकरी हरभरा विक्रीसाठी बाजार समित्यात घेऊन येत आहेत.