हवामान अंदाज सर्वच द्राक्ष विभागांमध्ये गुरुवारपर्यंत वातावरण कमी-अधिक प्रमाणात ढगाळ राहिले. त्यात सांगली विभागातील जत, उमदी, खानापूर, पळशी या भागांमध्ये मागील ३ दिवसांमध्ये कमी अधिक प्रमाणात पाऊस झाला. मात्र, आज शुक्रवारी (ता. २६) व पुढेही काही काळ उर्वरित द्राक्ष विभागामध्ये निरभ्र आकाश राहण्याची शक्यता आहे. संपूर्ण आठवडाभर कमाल तापमान ३०-३१ अंश सेल्सिअसपेक्षा अधिक राहू शकते. मात्र, हळूहळू रात्रीचे तापमान १६ -१७ अंशापर्यंत कमी होण्याची शक्यता आहे.
सध्याच्या परिस्थितीनुसार कुठल्याही रोगाचा प्रादुर्भाव होण्याची लक्षणे दिसत नाहीत. ज्या ज्या ठिकाणी मागील दोन दिवसांमध्ये पाऊस झालेला आहे, अशा ठिकाणी जुन्या डाऊनीचा प्रादुर्भाव पुन्हा वाढू शकतो. त्यामुळे डाऊनीचा जुना प्रादुर्भाव आहे किंवा आजूबाजूला न छाटलेल्या बागांमध्ये डाऊनी आहे, फक्त अशाच बागांमध्ये आंतरप्रवाही बुरशीनाशके फवारणीसाठी वापरणे फायद्याचे होऊ शकेल. अन्यथा डाय थायोकार्बामेट वर्गातील बुरशीनाशक (मॅन्कोझेब किंवा प्रोपीनेब किंवा मेटीराम, प्रमाण- २ ग्रॅम प्रतिलिटर) स्वतंत्रपणे फवारल्यास किंवा फोसेटिल एएल किंवा पोटॅशिअम सॉल्ट ऑफ फॉस्फरस ॲसिड ३ ते ४ ग्रॅम प्रतिलिटर या प्रमाणे मिसळून फवारल्यास नवीन फुटी डाऊनीपासून सुरक्षित राहतील.ढगाळ वातावरण आणि रात्री होणारे कमी तापमान या दोन्ही गोष्टी ज्या ठिकाणी दिसतात, तिथे भुरीच्या नियंत्रणासाठी फवारणी घेणे आवश्यक राहील. सर्वसाधारणपणे सल्फर (८० डब्ल्यूजी) दीड ते दोन ग्रॅम या प्रमाणात चांगले कव्हरेज मिळेल अशा प्रकारे भुरी नियंत्रणासाठी फवारावे.मागील काही दिवसामध्ये हलका पाऊस झालेल्या ठिकाणी भुरीसाठी जैविक नियंत्रण चांगले काम करू शकेल. ज्या ठिकाणी ट्रायअझोल वर्गातील बुरशीनाशके वापरलेली नाहीत व फक्त सल्फर वापरलेले आहे, अशा ठिकाणी ट्रायकोडर्मा ५ मि.लि. प्रतिलिटर किंवा बॅसिलस सबटिलिस २ ते ३ ग्रॅम प्रतिलिटर या प्रमाणात फवारावेत. चांगली आर्द्रता असलेल्या ठिकाणी सल्फर व जैविक नियंत्रणाचे घटक दोन्ही मिळून आंतरप्रवाही बुरशीनाशकांइतकेच चांगले काम करू शकते. म्हणून ज्या ठिकाणी हलके पाऊस झालेले आहेत, अशा ठिकाणी वरील प्रमाणे सल्फर व जैविक नियंत्रणाचे वर नमुदे केलेले घटक जरूर वापरावेत.